Fýtboldan ÁCh: Qazaqstan quramasy álem chempıonymen kúsh synasady
NUR-SULTAN. QazAqparat - Búgin, 28 naýryzda fýtboldan 2022 jylǵy álem chempıonatyna irikteý satysynda Qazaqstan quramasy elordada Frantsııany qabyldaıdy, dep habarlaıdy QazAqparat tilshisi.
Aıta keteıik, qazaqstandyq qurama irikteý satysynda D tobynda synǵa túsedi. Qarsylastary - Frantsııa, Ýkraına, Bosnııa jáne Gertsogovına, Fınlıandııa.
Qazaqstandyq fýtbolshylar alǵashqy týrda eshkimmen kezdesken joq. Al 24 naýryzda óz alańynda Frantsııa Ýkraınamen 1:1, Fınlıandııa Bosnııa jáne Gertsogovınamen 2:2 esebimen teń oınady.
FIFA jarııalaǵan sońǵy reıtıngte Frantsııa ekinshi orynda tur. Al Qazaqstan onda 122-orynda keledi.
Álem jankúıerlerine Frantsııa quramasy jaqsy tanys. Qaı kezeńde de bul eldiń fýtbolshylary ózin jaqsy qyrynan tanytyp keledi. Qanshama juldyzdar jarqyrap shyqty. Qazir de mundaı sańlaqtardan kende emes. Kezinde Mıshel Platını, Jan Tıgana, Zınedın Zıdan, Faben Bartez, Terrı Anrı, Davıd Trezege sekildi oıynshylar jasyl alań tórinde sheberligimen tánti etti. Búginde olardyń ornyn Ýgo Lorıs, Rafael Varan, Presnel Kımpembe, Pol Pogba, Olıve Jırý, Antýan Grızmann, Kılıan Mbappe sekildi jastar basty.
Aıta keterligi, búgingi qarsylasymyz talaı álemdik jáne qurlyqtyq dodada top jardy. Álem chempıonatynda eki márte altyn (1998, 2018), bir kúmis (2006), eki ret qola (1958, 1986) medal ıegeri atandy. Al Eýropa chempıonatynda eki márte chempıon (1984, 2000), bir ret ekinshi (2016), bir márte qola (1996) júldege qol sozdy. Osynyń ózi quramanyń áleýeti qandaı ekenin aıshyqtaı túsedi.
Bizdiń fýtbolshylarǵa Frantsııa Eýropada kezdesip otyrǵan 38-shi qarsylasy atanbaq. Ázirge qazaqstandyqtar olardan ózge Bosnııa men Gertsegovına, Gıbraltar, Izraıl, Ispanııa, Italııa, Kosovo, Lıhtenshteın, Lıýksembýrg, Norvegııa, Soltústik Irlandııa, Soltústik Makedonııa, Slovakııa, Slovenııa, Ýels jáne Shveıtsarııa quramalarymen kúsh synasyp kórgen joq.
Aıta keterligi, búginge deıin qazaq topyraǵyna Germanııa, Anglııa, Portýgalııa, Nıderlandy, Belgııa sekildi mańdaıaldy quramalar qadam basty. Onyń ishinde 2008 jylǵy Eýropa chempıonatyna irikteý satysynda qazaqstandyq fýtbolshylar Belgııamen eki márte (0:0, 2:2) teń túskenin jankúıerler áli kúnge deıin umyta qoıǵan joq.
Oǵan deıin Azııa qurlyǵynda dop tepken Qazaqstan UEFA quramyna 2002 jyly qabyldandy. Sodan beri álem chempıonatynda 60 oıyn ótkizgen. Onyń ishinde 12-de jeńiske jetip, 11-de teń tússe, 37-de qarsylasyna ese jiberdi.
Qazaqstan men Frantsııa quramalary arasyndaǵy kezdesý elorda ýaqytymen 19.00-de bastalyp, «Qazsport» telearnasynan tikeleı efırde kórsetiledi.
Atalǵan oıynda belarýstik maman Alekseı Kýlbakov bas tóreshi retinde qyzmet atqarady. Oǵan sol elden kelgen Dmıtrıı Jýk pen Oleg Maslıanko kómekshi bolady. Qosalqy tóreshi - Vıktor Shımýsık.
Sondaı-aq, búgin D tobynda Ýkraına óz alańynda Fınlıandııamen sheberlik baıqasady.
