Fýtboldan ÁCh qarsańynda Rıoda adam óltirý 50 paıyzǵa ósken
ASTANA. QazAqparat - Rıo-de-Janeıro shtatynyń bıligi fýtboldan álem chempıonatynyń qarsańynda tártipti qamtamasyz etý úshin qosymsha túrde birneshe myńdaǵan polıtsııa qyzmetkerlerin tartýda. Chempıonat maýsym aıynda bastalady, dep habarlady Bı-Bı-Sı.
Mundaı sheshimniń qabyldanýyna birinshi toqsanǵa baılanysty jarııalanǵan statıstıkalyq málimetter sebep bolǵan. Onda ótken jyldyń osy kezeńimen salystyrǵanda, megapolıste kisi óltirý qylmysynyń 50 paıyzǵa, páterlerdi tonaýdyń 85 paıyzǵa kóbeıgeni aıtylǵan.
Sonymen birge, avtokólikterdi tonaý men esirtki saýdasyna qatysty qylmystar da beleń alyp tursa kerek.
2014 jyldyń 12 maýsymynda álem chempıonatynyń ashylýyna jer-jerden ondaǵan myń adam keledi dep kútilýde.
