Fýtboldan ÁCh: Ispanııa quramasy Irannan aılasyn asyrdy
Bul oıynda jeńiske jetý ıspandar úshin óte mańyzdy edi. Sebebi belgili, alǵashqy týrda olar Portýgalııamen 3:3 esebimen teń oınap, nebári 3 upaıdy qorjynǵa saldy. Esesine Irannyń jaǵdaıy olardan birshama táýir. 15 maýsymda Marokkony 1:0 esebimen tize búktirgen parsylar taǵy da upaı qoryn tolyqtyrsa, jarystyń kelesi satysyna shyǵýy múmkin bolatyn. Sondyqtan Iran árbir oıynǵa tyńǵylyqty daıyndalýǵa tyrysatyny anyq. Olardyń kelesi qarsylastary - Ispanııa men Portýgalııa ekenin eskersek, dittegen maqsatyna ońaı túspeıtini belgili.
Aıtpaqshy, bul kezdesý ıspan qorǵaýshysy Jerar Pıke úshin erekshe boldy. Ol ulttyq qurama sapyndaǵy 100 oıynyn ótkizýge múmkindik aldy. 31 jastaǵy jigit óz quramasyndaǵy mundaı kórsetkishke qol jetkizgen 13-fýtbolshy retinde tirkeldi. Ázirge rekord atalmysh quramanyń burynńy qaqpashysy Iker Kasılıastiń enshisinde qalyp otyr. Ol ulttyq quramada 167 oıyn ótkizgen edi.
Ispanııanyń bas bapkeri Fernando Ierro oıynnyń aldynda atalmysh qarsylastary jóninde pikirin bildirgen edi. «Іrikteý kezeńinde parsylar 37 gol soqqan eken. Olardyń 40%-y standarttan soǵylǵan. Sondyqtan biz olardyń standartty oryndaýyna basa nazar aýdaramyz», - degen bolatyn.
Aıta keterligi, qos qurama buǵan deıin birde-bir márte kezdesip kórgen joq. Tatarstan astanasy - Qazan qalasyndaǵy oıyn olar úshin tusaýkeser kezdesý retinde eldiń esinde qalary anyq. FIFA-nyń sońǵy reıtınginde Ispanııa 10-orynda tursa, Iran37-orynda keledi.
Iran kezdesýge qyzyl, ıspandar aq tústi jeıde kıip shyqty. Eýropa qurlyǵynyń ókilderi áý degennen oıyn tizginin qolǵa aldy. Árbir mınýttyń qadirin túsinedi. Úsh upaıǵa qol jetkizýge baryn saldy. Solaı bolarlyq jóni bar. Jeńilis tapqan jaǵdaıda jarysty jalǵastyrýdan shet qalyp qoıýy ǵajap emes. 2010 jylǵy álem chempıondary ony tolyq túsinedi. Sondyqtan birden shabýyl shebin nyǵaıtýǵa bar kúshin saldy. Esesine Iran gol jiberip almaý jolyn qarastyrdy. Qorǵanysqa barlyǵy birdeı kóńil bóldi. Shabýylshylar da óz qorǵaýshylaryna kómek berdi. Sondyqtan ıspandar qanshama qaýipti sátterdi uıymdastyrǵanymen, onyń eshqaısysy olarǵa paıdasyn alyp kelgen joq.
Ekinshi kezeńde de dál osyǵan uqsas jaǵdaıda órbidi. Ispandar birden-aq shabýylǵa shyqty. Dese de dop dittegen ornyna jetken joq. Ispandar kóp kútken gol 53-mınýtta soǵyldy. Bul goldy shabýylshy Dıego Kosta óz enshisine jazdy. Irandyqtar da qarap qalǵan joq. Olar 63-mınýtta tarazy basyn teńestirgen edi. Ýrýgvaılyq tóreshi Andres Kýnıa ony ofsaıdtan soǵyldy degen sheshimdi eseptegen joq. Sóıtip Ispanııa Irandy 1:0 esebimen jeńdi.
Aıta keteıik, bul toptaǵy Portýgalııa quramasy Marokkodan basym túsip, jarystyń kelesi kezeńine ótti.
