Fýtboldan ÁCh: Horvatııa qarqynyn kúsheıte ala ma
ASTANA. QazAqparat - Búgin túnde Nıjnıı Novgorod qalasynda álem chempıonatynyń pleı-off básekesinde Horvatııa men Danııa kúsh synasady, dep habarlaıdy QazAqparat tilshisi.
Horvatııa - toptyq syndaǵy úsh kezdesýin de jeńispen aıaqtap, 9 upaıǵa ıe bolǵan sanaýly komandanyń biri. Zlatko Dalıch jattyqtyratyn horvattar sol qarqynynan aıyrylmaı, shırek fınalǵa shyǵa ala ma, ony aldaǵy match kórsetedi.
Budan jıyrma jyl buryn Frantsııada ótken álem chempıonatynda qola júldege ıe bolǵan Horvatııanyń bıyl sol bıikten asyp tússem be degen maqsat qoıyp otyrǵany anyq. Sol kezdegi Davor Shýker, Robert Prosınechkı, Zvonımır Bobandar ańyzǵa aınalsa, Lýka Modrıch, Ivan Rakıtıch syndy qazirgi juldyzdar olardan kem emes.
Budan eki jyl buryn horvattar Túrkııa men Ispanııany utyp, Eýropa birinshiligin de tamasha bastap edi. Alaıda pleı-off kezeńinde bolashaq chempıondar Portýgalııaǵa qosymsha ýaqytta ese jiberdi. Bul joly sol olqylyqty qaıtalamas úshin barlyq sheberlikterin salýǵa týra keledi.
Árıne, álem chempıonatynyń irikteý týrnırinde Qazaqstanmen bir topta oınaǵan Danııa ońaı shaǵylatyn jańǵaq emes. Ony qazaqstandyq jankúıerler jaqsy biledi. Ege Hareıdeniń shákirtteri toptyq básekede uıymshyl komanda ekendigin kórsete bildi. Óz qaqpasyna bir ǵana gol (Avstralııamen matchta penaltıden) jiberip alǵan qurama ázirge jeńilis dámin tatqan joq. Alaıda danııalyqtar qarsylastar qaqpasyna nebári eki-aq gol soqty. Bul - pleı-off kezeńine shyqqan 16 komanda arasyndaǵy eń tómen kórsetkish. Horvattarǵa Krıstıan Erıksenge kóbirek kóńil aýdarýǵa týra keledi. Ol alǵashqy matchta nátıjeli pas berse, sodan keıin ózi bir goldyń avtory atandy.
Pleı-off kezeńine joldamany kúni buryn sheship qoıǵan Horvatııa Islandııamen oıynǵa qosalqy quramyn shyǵardy. Endi argentınalyq Nestor Pıtana qazylyq etetin aldaǵy matchqa Ivan Rakıtıch, Marıo Mandjýkıch, qaqpashy Danıel Sýbashıch, negizgi qorǵaýshylar Shıme Vrsalko, Domagoı Vıda, Deıan Lovren, Ivan Strınıch, sondaı-aq orta tustaǵy Ante Rebıchtiń qaıta oralatyny haq.
Danııa sapynda birqatar ózgerister bolýy múmkin. Mysaly, orta tusty nyqtaıtyn Tomas Dıleınımen birge Ýılm Kvıst nemese Lasse Shene shyǵa ma, ázirge belgisiz.
Buǵan deıin Horvatııa men Danııa iri jarystarda bir-aq ret kezdesken. 1996 jylǵy Eýropa chempıonatynyń irikteý saıysynda horvattar qarsylasyn 3:0 esebimen oısyrata jeńdi. Óz tarıhtarynda bes márte joldary toqaılasqan qos quramanyń árqaısysy eki retten jeńiske jetip, bireýinde teń tarqasqan.
Aıta keteıik, bul oıynda utqan komanda 7 shilde kúni Sochı qalasynda Ispanııa - Reseı jubynyń jeńimpazymen alańǵa shyǵady.
