Fýtboldan ÁCh: Frantsııa Ýrýgvaıdy utyp, jartylaı fınalǵa joldama aldy
ASTANA. QazAqparat - Nıjnıı Novgorod qalasynda shırek fınalda Ýrýgvaı men Frantsııa komandalary jasyl alańǵa shyqty, dep habarlaıdy QazAqparat tilshisi.
Osyǵan deıin qos qurama ózara segiz márte kezdesse, sonyń úsheýinde ýrýgvaılyqtar jeńiske jetken eken. Bir oıynda frantsýzdardyń mereıi ústem bolyp, tórt match teń aıaqtalǵan. Degenmen solardyń bárinen búgingi básekeniń bási joǵary edi.
Argentınalyq Nestor Pıtana tórelik etken kezdesýde Ýrýgvaıdyń bas bapkeri Oskar Tabares myna oıynshylaryna senim artty: Fernando Mýslera (qaqpashy), Hose Marııa Hımenes, Dıego Godın (kapıtan), Martın Kaseres, Dıego Laksalt, Naıtan Nandes, Lýkas Torreıra, Rodrıgo Bentankýr, Matıas Vesıno, Lýıs Sýares, Krıstıan Stýanı.
Portýgalııamen oıynda jaraqat alyp qalǵan ýrýgvaılyqtardyń surmergeni Edınson Kavanıdiń ornyna K.Stýanı shyqty. Munyń Ýrýgvaı quramasynyń shabýyl shebin álsiretkeni baıqalyp turdy.
Frantsııany jattyqtyratyn Dıde Desham ýrýgvaılyqtarǵa syralǵy shákirtterin qarsy qoıdy: Ýgo Lorıs (qaqpashy ári kapıtan), Lıýka Ernandes, Samýel Ýmtıtı, Rafael Varan, Benjamen Pavar, Ngolo Kante, Pol Pogba, Korenten Tolısso, Antýan Grızmann, Kılıan Mbappe, Olıve Jırý.
Birinshi bolyp qaqpaǵa qaýipti frantsýzdar tóndirdi. 15-mınýtta oń qanattan berilgen pasty Jırý Mbappege jyljytty, Kılıannyń soqqysy qaqpadan asyp ketti.
Birinshi taım sońyna taman Bentankýr Tolıssoǵa qarsy tártip buzyp, eskertý aldy. Antýan Grızmannyń baǵyttaǵan aıyp dobyn Rafael Varan 40-mınýtta baspen qaqpaǵa engizdi - 1:0.
Tórt mınýttan keıin ýrýgvaılyqtar esepti teńestirip kete jazdady. Kaserestiń soqqysynan keıin Lorıs óz qaqpasyn aman alyp qaldy.
Ekinshi taımda Ýrýgvaı quramasy alǵa umtylǵanymen, 61-mınýtta Fernando Mýslera Grızmannyń alystan tepken soqqysyn qaıtaram dep, óz qaqpasyna engizip aldy - 2:0.
Budan soń Oskar Tabares shákirtteriniń oıyny ońala qoıǵan joq. Odan góri frantsýzdardyń esepti eseleıtindeı múmkindikteri boldy.
Osylaısha Frantsııa Ýrýgvaıdy 2:0 esebimen utyp, jartylaı fınalǵa joldama aldy. Bul - frantsııalyqtar júldeli oryndar úshin talasady degen sóz.
Aıta keteıik, Frantsııa 10 shilde kúni Sankt-Petorborda Brazılııa - Belgııa jubynyń jeńimpazymen fınalǵa beriler joldamany sarapqa salady.
