Fýtboldan ÁCh: Brazılııaǵa da kezek keldi

Osyǵan deıin bes márte álem chempıony atanǵan brazılııalyqtar - bıyl da altyn júldeden úmitkerlerdiń biri. Adenor Tıte jattyqtyratyn komandanyń bas juldyzy, árıne, Neımar ekendigi anyq. Sondaı-aq Gabrıel Jezýs, Vıllıan, Fılıppe Koýtıno, Paýlıno, Kazemıro, Marselo (komanda kapıtany), Mıranda, Tıago Sılva, Danılo, qaqpashy Alıson eshkimnen kem emes. Brazılııalyqtar 2002 jyldan beri jeńis shyńyna kóterile almaı keledi. Ásirese, óz elinde ótken dodanyń jartylaı fınalynda Germanııadan 1:7 esebimen (óz tarıhyndaǵy eń iri esep) oısyraı jeńilýi jankúıerlerdiń esinen ketpesi anyq. Degenmen brazılııalyqtardyń qazirgi quramy myqtyraq, oınaý máneri de jaqsy, sondyqtan olardyń júldege qol sozatyny haq. Keshe Lıonel Messıdiń penaltıden múlt ketip, argentınalyqtardyń nebári 320 myń halqy bar, chempıonatqa tuńǵysh qatysyp otyrǵan Islandııa eliniń fýtbolshylarymen teń oınaýy brazılııalyqtarǵa sabaq bola ma, ony oıyn kórsetedi.

Onyń ústine Shveıtsarııa Eýropa elindegi myqtylardyń biri bolyp esepteledi. Bul joly alańǵa ıAn Zommer, Shtefan Lıhtshtaıner, Fabıan Sher, Manýel Akandjı, Rıkardo Rodrıges, Valon Behramı, Granıt Djaka, Djerdan Shakırı, Blerım Djemaılı, Stıven Tsýber, Harıs Seferovıch shyǵady dep kútilýde. Bul komanda kapıtany Lıhtshtaınerdiń Shveıtsarııa quramyndaǵy 100-inshi oıyny bolmaq.

Vladımır Petkovıch baptaıtyn shveıtsarııalyqtar sońǵy úsh álem chempıonatyna qatysyp, 1/8 fınalyna deıin jetti. Bıyl sol kórsetkishin jaqsartýǵa kúsh salatyny anyq.

Qos komanda buǵan deıin dúnıejúzilik dodada bir-aq ret kezdesip, 1954 jyly 2:2 esebimen teń tarqasqan.

Bul oıyn Ońtústik Amerıka men Eýropa fýtbolynyń qaısysy myqty degen ejelgi taıtalastyń taǵy bir kórinisi bolmaq.

Aıta keteıik, meksıkalyq tóreshi Sesar Ramos Palasýeles qazylyq etetin oıyndy «Qazaqstan» ulttyq arnasy Astana ýaqytymen saǵat 00.00-den bastap kórsetedi. E tobynda sondaı-aq Kosta-Rıka men Serbııa quramalary da oınaıdy.