Fýtboldan ÁCh: Brazılııa men Shveıtsarııa teń oınady

Quramy jaǵynan bul matchta álemniń bes márte chempıony - Brazılııanyń bási bıik ekendigi  anyq. Degenmen Eýropada asyǵy alshysynan túsip júrgen shveıtsarııalyqtardy eshkim osal deı almas.

Brazılııa - 1930 jyldan beri ótkizilip kele jatqan álem chempıonattaryna úzbeı qatysqan birden-bir komanda. Oǵan qosa brazılııalyqtardaı jeńis tuǵyryna bes ret eshkim kóterilip kórgen emes.

Meksıkalyq Sesar Ramos qazylyq etken kezdesýde alǵashqy soqqyny shveıtsarııalyqtar jasady. 6-mınýtta alǵa umtylǵan Brazılııanyń bas juldyzy Neımardy Granıt Djaka jeıdesinen tartyp toqtatqanymen, tóreshi aýyzsha eskertýmen shekteldi. Kóp uzamaı sol qaptaldan Neımar tepken dopty Paýlıno qaqpaǵa baǵyttaǵanymen, ony ıAn Zommer toıtara bildi.

Eki jyldan beri Adenor Tıte jattyqtyratyn brazılııalyqtar oıyn tizginin birtindep óz qolyna aldy. Aqyry bıyl Anglııanyń «Lıverpýl» klýbynan Ispanııanyń «Barselonasyna» aýysqan álemdegi eń qymbat fýtbolshylardyń biri Fılıppe Koýtıno 20-mınýtta aıyp alańynan keri serpilgen dopty alystan tamasha oryndap, qaqpaǵa dál túsirdi - 1:0.

Tórt jyl boıy bosnııalyq maman Vladımır Petkovıch baptaıtyn shveıtsarııalyqtar brazılııalyqtardyń qaqpasyna pálendeı qaýip tóndire almady. Kerisinshe Neımarǵa qarsy kezekti ret tártip buzylǵannan keıin Shveıtsarııa quramynda búgin 100-inshi márte alańǵa shyqqan komanda kapıtany Shtefan Lıhtshtaıner eskertý alyp tyndy.

Birinshi taım sońynda buryshtamadan Neımar bergen dopty Tıago Sılva baspen soǵyp, qaqpadan sál asyryp jiberdi.

Kezdesýdiń ekinshi kezeńi shveıtsarııalyqtardyń qarsy shabýylyn dóreki oınap, toqtatqan Kazemıronyń eskertý alýymen bastaldy. 50-mınýtta Shveıtsarııa juldyzdarynyń biri Djerdan Shakırı buryshtamadan bergen dopty aıyp alańynda bos qalǵan Stıven Tsýber baspen qaqpaǵa top etkizdi - 1:1.

Budan keıin brazılııalyqtar qarqynyn údetip, Kazemıronyń ornyna Fernandıno shyqty. Paýlınony Renato Aýgýsto almastyrdy.

Neımarǵa «tosqaýyl qoıǵan» Fabıan Sher men Valon Behramı de eskertý aldy. Osydan soń-aq Behramıdiń ornyna Denıs Zakarıa kirdi.

Koýtınonyń qaýipti soqqylarynan keıin dop birde qorǵaýshyǵa tıse, ekinshisinde qaqpadan qıys ketti. Gabrıel Jezýs shveıtsarııalyq qorǵaýshymen «qushaqtasqannan» keıin aıyp alańynda qulap qalǵanymen, tóreshi penaltı belgileýdi qup kórgen joq. Jezýstyń ornyna «Lıverpýldyń» shabýylshysy Roberto Fırmıno, Shveıtsarııadan Harıs Seferovıchtiń ornyna Brel Embolo   tyńnan qosyldy. Budan kóp eshteńe ózgere qoıǵan joq.

Match sońyna taman Neımardyń baspen soqqan dobyn ıAn Zommer qaqshyp ala bildi. Sodan keıin birneshe múmkindikti brazılııalyqtar paıdalana almady.

Osylaısha bıylǵy chempıonat favorıtterge ońaı tıip otyrǵan joq. Buǵan deıin Argentına birinshilikke alǵash qatysyp otyrǵan ıslandyqtarmen teń oınasa, Frantsııa avstralııalyqtardy bir ǵana dop aıyrmashylyǵymen utty. Eń tosyn nátıje, fýtboldan álem chempıony Germanııa quramasy alǵashqy kezdesýinde oıda joqta Meksıkadan utylyp, jaǵdaıyn qıyndatyp aldy. Endi, mine, Brazılııa Shveıtsarııamen 1:1 esebimen teń oınap, upaı joǵaltty.

Eske sala keteıik, E tobynda budan buryn Aleksandr Kolarovtyń tamasha aıyp soqqysy arqasynda Serbııa Kosta-Rıka komandasyn 1:0 esebimen jeńgen bolatyn. 22 maýsym kúni Brazılııa - Kosta-Rıka, Serbııa - Shveıtsarııa quramalary ózara kezdesedi.

Chempıonat qyzyp keledi.