Fýtboldan ÁCh: Brazılııa Argentınanyń kebin kıe me

Jankúıer qaýymǵa Brazılııa quramasy jaıynda qaıtalap aıtyp jatý artyq bolar. Fýtboldan talaı talantqa aq jol siltegen eldiń oıynshylary qaı kezde de joǵary baǵalanady. Ulttyq quramaǵa úmitker jigitterdiń qatary qalyń. Bas bapker solardyń arasynan úzdigin iriktep alady. Sondyqtan qandaı dop dodasynda da brazılııalyq jigitter basty favorıt bolatyny belgili. Reseıdegi dúbirli dodada bas júldege qol sozatyn quramalar qatarynda osy eldiń sańlaqtary sanalyp otyr.

Іrikteý kezeńinde atalmysh qurama joǵary deńgeıde oıyn kórsetti. Toptyq básekede 18 oıynda 41 upaı jınap, kósh tizginin qolǵa aldy. Ózinen keıingi oryndaǵy Ýrýgvaıdan 10 upaı ozyp ketkeniniń ózi kóp jaıdy ańartsa kerek-ti. Ataqty fýtbolshy Peleniń izbasarlary nebári 1 oıynda jeńildi. Olar 5 oıynda teń túsip, 12 kezdesýde úsh upaı oljalady. Osylaısha olar Reseıdegi aıtýly alamanǵa elden erterek qol jetkizip qoıǵanyn aıta ketkenimiz jón bolar. Brazılııa birinshiliktiń alǵashqy týrynda Shveıtsarııamen 1:1 esebimen teń oınady.

Kosta-Rıka jigitteri álem birinshiliginiń fınaldyq kezeńinde bıyl besinshi márte baq synap jatyr. Ázirge bul dodada qol jetkizgen tabysy 2014 jyly shırek fınalǵa deıin jetkendigi bolyp tabylady. Sol jyly olar Ýrýgvaı, Anglııa, Italııa sekildi quramalardy artqa salyp ketti. Ýrýgaıdy 3:1, Italııany 1:0 esebimen jeńip, sońǵy kezdesýde Anglııamen 0:0 esebimen teń oınady. Jarystyń kelesi satysynda Grekııamen negizgi kezeńde 1:1 esebimen teń túsip, penaltı tebý arqyly jarysty jalǵastyrdy.

Shırek fınalda da kosta-rıkalyq jigitter táp-táýir oıyn kórsetti. Gollandııamen kezdesýde negizgi kezeńde 0:0 esebi tirkeldi. Penaltı tebýde gollandııalyqtar mergendik tanytty. Sodan beri nebári tórt jyl jyl ótti. Sol synda tájirıbe jınaǵan jigitter qazir sheberlikterin arttyra tústi. Bálkim, bul joly odan da joǵary jetistikke qol sozar. Alaıda olar bıylǵy birinshiliktiń alǵashqy týrynda Serbııa quramasyna 0:1 esebimen jol berip qoıdy. Endeshe, ekinshi kezdesý olardy erterek eline qaıtarýy múmkin nemese jarysty jalǵastyrý múmkindigin arttyra túseri sózsiz.

Kosta-Rıka quramasynyń bas bapkeri Oskar Ramıres aldaǵy oıyn jaıynda «Alǵashqy kezdesýde bizdiń oıynymyz júrgen joq. Biz birinshilikke beker kelgen joqpyz. Aldymyzǵa úlken maqsat qoıdyq. Sol maqsatymyzǵa jetýge tyrysamyz», - dedi.

Brazılııanyń bas bapkeri Tıte «Quramadaǵy barlyq fýtbolshyǵa joǵary deńgeıde oınaý - basty talap. Degenmen Neımarǵa artylatyn senim úlken. Ol quramda kóshbasshylyq mindetin atqarýy tıis»,- dep óz pikirin bildirdi.

Esterińzge sala ketelik, bul kezdesý Astana ýaqytymen 18.00-de Reseıdiń Sankt-Peterbýrg qalasyndaǵy «Sankt-Peterbýrg arena» stadıonynda ótedi. Kezdesý «Qazsport» arnasynan kórsetiledi. Sondaı-aq, E tobynda Serbııa men Shveıtsarııa quramalary («Qazaqstan». 00.00)  kezdesedi. Al D tobynda Nıgerııa men Islandııa («Qazaqstan». 21.00) ózara sheberlik baıqasady.