Fýtboldan ÁCh: Belgııa Kanada quramasyn qapy qaldyrdy

ASTANA. QazAqparat – Qatarda fýtboldan ótip jatqan álem chempıonatynda F tobynda Belgııa men Kanada quramalary sheberlik baıqasty, dep habarlaıdy QazAqparat tilshisi.

F tobynda 2018 jylǵy álem chempıonatynyń kúmis júldegeri Horvatııa alǵashqy oıynynda Marokkomen teń oınaǵandyqtan, jankúıerler taǵy bir favorıt – Belgııaǵa kóz tikken edi. Budan tórt jyl buryn qola júldeger atanǵan Roberto Martınes shákirtteriniń dúnıejúzilik dodada top jarýdy armandaıtyny anyq.

Kanadalyqtar 1986 jyly ǵana álemdik dodaǵa bir-aq ret qatysqanymen, qarsylastarynyń qaqpasyna gol soǵa almaı ketken edi.

Belgııa men Kanada buǵan deıin 1989 jyly kezdesip, eýropalyqtar 2:0 esebimen jeńgen bolatyn.

Bul joly kanadalyqtar esh qaımyqpastan shabýylǵa kóshti. 9-mınýtta belgııalyq ıAnnık Karrasko óz aıyp alańynda qolmen oınaǵannan keıin 11 metrlik penaltı belgilendi. Alaıda Kanadanyń jaryq juldyzy, «Bavarııa» (Mıýnhen) klýbynyń qorǵaýshysy Alfonse Devıstiń tepken dobyn Tıbo Kýrtýa óz qaqpasyna darytpady. Sóıtip A.Devıs Kanadanyń álem chempıonatyndaǵy alǵashqy golyn soǵatyn múmkindikti paıdalana almady.

Esesine 44-mınýtta Tobı Alderveıreldtiń alystan bergen pasyn keremet paıdalanǵan Mıshı Batshýaıı Belgııa quramasyn alǵa shyǵardy – 1:0.

Ekinshi kezeńde kanadalyqtar qansha tyrysqanymen, belgııalyqtar qorǵanysy syr bere qoıǵan joq.

Osylaısha, F tobynda Belgııa úsh upaımen kósh bastady. 27 qarasha kúni Belgııa – Marokko jáne Horvatııa – Kanada quramalary talasqa túsedi.

Eske sala keteıik, budan buryn fýtboldan álem chempıonatynda Frantsııanyyń Aýstralııany iri eseppen utqanyn jazǵan bolatynbyz.

Sondaı-aq Germanııa quramasy Japonııadan jeńilip qaldy.

Al Ispanııa Kosta-Rıkany 7:0 esebimen oısyrata jeńdi.

FOTO: DMITRII GOLÝBOVICh, «ChEMPIONAT»