Fýtboldan ÁCh: Argentınany oısyrata jeńgen Horvatııa pleı-off kezeńine shyqty
ASTANA. QazAqparat - Fýtboldan álem chempıonatynda D tobynda Nıjnıı Novgorod qalasynda Argentına men Horvatııa komandalary alańǵa shyqty, dep habarlaıdy QazAqparat tilshisi.
Birinshi týrda Nıgerııany 2:0 esebimen utqan Horvatııa bul topta kósh bastasa, Argentına Islandııamen teń tarqasqan edi.
Ózbekstandyq tóreshi Ravshan Irmatov qazylyq etken kezdesýde argentınalyqtardy stadıonda Dıego Maradona bastaǵan jankúıerler qoldap-qoshtap otyrdy.
Argentınanyń bas bapkeri Horhe Sampaolı sátti bolmaǵan alǵashqy matchtan qorytyndy shyǵaryp, Markos Rohonyń ornyna Markos Akýnıany qosty. Shabýyl shebinde sol jaq qanatta Anhel Dı Marııany alyp tastap, Edýardo Salvıony shyǵardy.
Zlatko Dalıch jattyqtyratyn Horvatııa sapynda da birer ózgeris bolyp, orta shepte Andreı Kramarıchti Martselo Brozovıch almastyrdy. Ante Rebıch alǵa qaraı oıysty.
Horvattardyń birinshi qarymta shabýyly golmen aıaqtalýǵa sál-aq qaldy. Sol qanattan qustaı ushqan Ivan Perıshıchtiń asa qaýipti soqqysyn argentınalyq qaqpashy Vılfredo Kabalero qaıtaryp úlgerdi. Dop buryshtamaǵa ketti.
Argentınalyqtar da qarap qalmaı, 12-mınýtta ádemi kombınatsııadan keıin komanda kapıtany Lıonel Messıdiń aıaǵy dopqa durys jetpeı qaldy. On mınýttan keıin Akýnıanyń sol qanattan baǵyttaǵan doby Danıel Sýbashıch qorǵaǵan qaqpa mańdaıshasyna tıip, asyp ketti.
30-mınýtta qorǵaýshydan keri serpilgen dopty Entso Peres bos qalǵan qaqpaǵa kirgize almady. Úsh mınýt óter-ótpeste Shıme Vrsalkonyń tamasha pasynan keıin qaqpashymen jekedara shyqqan Marıo Mandjýkıchtiń baspen soqqan doby qıys ketti.
Básekeniń «qyzýy» birte-birte kóterile túsip, qatarynan eki márte dóreki oınaǵan A.Rebıch eskertý alyp tyndy.
Birinshi taım sońynda qarymta shabýyldan soń horvattardyń kapıtany Lýka Modrıchtiń keremet pasyn Rebıch paıdalana almady.
Ekinshi taımda Modrıchtiń pasynan keıin alǵa umtylǵan Rebıchti Gabrıel Merkado toqtatyp, eskertý aldy. 53-mınýtta Kabaleronyń qateliginen soń A.Rebıch dopty toǵyzdyqqa dál túsirdi - 1:0. Osylaısha «sharýasyn bitirgen» Rebıchtiń ornyna Andreı Kramarıch shyqty.
Amaly qalmaǵan H.Sampaolı Serhıo Agýeronyń ornyna tyńnan Gonsalo Igýaındy qosty. Salvıony Krıstıan Pavon almastyrdy. 63-mınýtta qaqpa aldyndaǵy qarbalas sátte Ivan Rakıtıch Messıge gol soǵýǵa múmkindik bermedi. Kóp uzamaı Argentınany qutqarýǵa taǵy bir shabýylshy Paýlo Dıbalo qosyldy.
Horvattar saýatty oınap, shabýyldy da umytqan joq. 80-mınýtta L.Modrıchtiń aıyp alańyna kirmesten shirene tepken doby qaqpadan bir-aq shyqty - 2:0.
Bul kezdesýde Lýka Modrıch óziniń shyn máninde kóshbasshy ekendigin tanyta bildi. Lıonel Messı týraly bulaı aıtý qıyn.
85-mınýtta Nıkolas Otamendıdiń dórekiliginen keıin qos komanda oıynshylary shekisip qala jazdady. Ivan Rakıtıchtiń aıyp dobynan keıin argentınalyqtardy úshinshi goldan qaqpa mańdaıshasy qutqardy.
90-mınýtta Maksımılıano Mesanyń soqqysyna Domagoı Vıda tosqaýyl qoıdy. Іle-shala uıymdastyrylǵan shabýyldan keıin Kabalero I.Rakıtıchtiń soqqysyn qaıtaryp úlgergenimen, Mateo Kovachıch dopty qaıtadan Ivanǵa jyljyta saldy. I.Rakıtıch múlt ketken joq - 3:0.
Horvattar toıdy bastap ketse, Argentına jerge qarady.
Sonymen, osy oıynnan keıin 6 upaı jınaǵan Horvatııa quramasy pleı-off kezeńine shyqsa, bir ǵana upaıy bar Argentınanyń jaǵdaıy tipti qıyndady. Endi olardyń toptan shyǵýy tek ózderine ǵana baılanysty emes. Búgin Volgograd qalasynda Nıgerııa - Islandııa matchy nemen aıaqtalady. Sodan keıin 26 maýsym kúni bolatyn Nıgerııa - Argentına, Islandııa - Horvatııa kezdesýleri bar máseleni sheshedi.
