Fýtboldan ÁCh: Argentına men Frantsııanyń qaısysy myqty?
ASTANA. QazAqparat - Búgin Qazan qalasynda Argentına men Frantsııa quramalary pleı-off básekelerin bastaıdy, dep habarlaıdy QazAqparat tilshisi.
Qos komanda bul chempıonatta ázirge jarqyrap kózge túse qoıǵan joq. Lıonel Messıi bar argentınalyqtar Islandııamen teń túsip, Nıgerııany áreń utsa, Frantsııa Danııamen matchta qulshynys tanytpady. Endi bulardyń qaısysy shırek fınalǵa laıyqty, ony búgingi oıyn kórsetedi.
Irandyq Alıreza Faganı qazylyq etetin básekede Dıde Desham Frantsııa quramasyndaǵy bapkerlik qyzmetindegi 80-inshi matchyn ótkizedi. Tórt jyl ishinde ol saqadaı saı, keremet qurama jınaqtaı alǵan joq. Mysaly, Danııamen kezdesýde alańǵa Jırý, Grızmann, Lemar, Fekır sııaqty fýtbolshylar shyqqanymen, bir-birimen túsinisip, oınaı almady. Shabýyl shebinde azýsyzdyq tanytty. Odan burynǵy Avstralııa men Perýmen matchta da frantsýzdarǵa sáttilik joldas boldy.
Argentına quramasynda jaǵdaı tipti ýshyqqandaı. Oıynshylar jattyqtyrýshy Horhe Sampaolıdi tyńdaǵysy kelmeıtindeı. Messı áriptesterine ózi nusqaý berse, Sampaolıdiń, bálkim, keregi qansha, Ispanııa sekildi bas bapkermen qosh aıtyspaı ma, áıteýir túsiniksiz jaıt oryn alýda.
Bir qyzyǵy, Frantsııa men Argentına pleı-off básekelerinde ózara birinshi ret oınaıdy. Buǵan deıin komandalar 12 márte kezdesip, sonyń altaýynda argentınalyqtar jeńiske jetip, eki ret teń nátıje tirkelip, tórteýinde Frantsııa basym tústi. Onyń ústine sońǵy 32 jylda qos quramanyń joldary joldastyq kezdesýlerde eki-aq ret toqaılasyp, onda Argentına 1:0 jáne 2:0 esebimen utty.
Sonymen qatar aldaǵy oıyn álem chempıony ataǵy barlar arasyndaǵy Reseıdegi birinshiliktegi alǵashqy báseke bolmaq.
Aıta keteıik, bul matchta asyǵy alshysynan túsken komanda shırek fınalda 6 shilde kúni Nıjnıı Novgorodta Ýrýgvaı - Portýgalııa jubynyń jeńimpazymen kezdesedi.
