Fýtboldan ÁCh: AQSh pen Iran quramalary 1/16 fınalynda kezdesýi múmkin
ASTANA. KAZINFORM — AQSh pen Iran arasyndaǵy qarym-qatynas áli de kúrdeli kúıinde qalyp otyr. Soǵan qaramastan, matchtarynyń basym bóligi AQSh aýmaǵynda ótetin fýtboldan 2026 jylǵy álem chempıonatyna Iran quramasy qatysýǵa ruqsat aldy, dep habarlaıdy Bild.
Iran quramasy úshin týrnır birqatar qıyndyqtarmen baılanysty bolmaq. Atap aıtqanda, vıza rásimdeý, qaýipsizdik sharalarynyń kúsheıýi jáne Meksıkanyń Tıhýana qalasyndaǵy oqý-jattyǵý bazasynan AQSh-taǵy oıyndarǵa qatynaý máseleleri bar. Degenmen komanda álem chempıonatyna qatysýǵa nıetti.
Sondaı-aq AQSh pen Iran quramalary ózara kezdesýi de múmkin. Mundaı match saıası ahýalǵa baılanysty erekshe nazar aýdaratyny sózsiz. Eger eki qurama da óz toptarynda ekinshi oryn alsa, olar 3 shildede Tehas shtatyndaǵy Arlıngton qalasynda ótetin 1/16 fınaldyq kezdesýde jolyǵady.
Álem chempıonatynyń 104 matchynyń 78-i AQSh-ta ótedi. Oıyndar Atlanta, Boston, Dallas, Hıýston, Kanzas-Sıtı, Los-Andjeles, Maıamı, Nıý-Iork/Nıý-Djersı, Fıladelfııa, San-Frantsısko jáne Sıetl qalalarynda uıymdastyrylady. Týrnırge 5 mıllıonnan astam jankúıer keledi dep kútiledi. Qalǵan matchtardy Kanada men Meksıka qabyldaıdy.
Buǵan deıin Kazinform agenttigi Irannyń álem chempıonatyna qatysý úshin FIFA uıymyna qoıǵan 10 talabyn jarııalaǵan bolatyn.
Aıta keteıik, búgin, 11 maýsymda, fýtboldan 23-shi álem chempıonatynyń shymyldyǵy túriledi. Kazinform tilshisi jankúıerlerdi qandaı qyzyqtar kútip turǵanyn baıandap berdi.
Budan bólek, qazaqstandyqtar 2026 jylǵy fýtboldan álem chempıonatynda kimge jankúıer bolatynyn jazǵanbyz.
