Fýtboldan ÁCh: Ahmed Musanyń qos goly Nıgerııaǵa jeńis áperdi

Bul kezdesý qos qurama úshin de asa mańyzdy edi. Alǵashqy týrda Afrıkanyń eń mańdaıaldy komandalarynyń biri Nıgerııa Horvatııaǵa 0:2 esebimen ese jiberse, dúnıejúzilik dodaǵa tuńǵysh qatysyp otyrǵan Islandııa eki márte álem chempıony Argentınamen teń tarqasqan edi.

Osyǵan deıin alty ret dúnıejúzilik dodaǵa qatysqan nıgerııalyqtar sonyń úsheýinde pleı-off kezeńine shyqqan bolatyn. Sondaı-aq Nıgerııa - 1998 jylǵy Olımpıada chempıony. Islandııalyqtar ázirge ondaı tabystarymen maqtana almaıdy. Degenmen Islandııada 360 myńdaı turǵynnyń 22 myńy nemese 7 paıyzdaıy fýtbolmen aınalysady eken, bapkerleri de kúrt kóbeıip keledi. Kishkentaı eldiń úlken maqsattarǵa qol jetkize alatynynyń naqty kórinisi, mine, osy.

Nıgerııa quramasynyń bas bapkeri, nemis mamany Gernot Ror bul matchta myna oıynshylarǵa senim artty: Frensıs Ýzoho (qaqpashy), Braıan Idový, Ýılıam Ekong, Leon Balogýn, Kennet Omerýo, Vılfred Ndıdı, Ogenekaro Etebo, Djon Obı Mıkel (komanda kapıtany), Vıktor Mozes, Ahmed Musa, Kelechı Iheanacho. Olardyń arasynda Eýropanyń beldi komandalarynda óner kórsetetinderi jetkilikti.

Islandııalyq bapker Heımır Hadlgrımsson usynǵan quram da osal emes: Hannes Halldoýrsson (qaqpashy), Bırkır Sevarsson, Herdýr Magnýsson, Ragnar Sıgýrdsson, Karı Arnason, Gılfı Sıgýrdsson, Aron Gýnnarsson (kapıtan), Bırkır Bıarnason, Rıýrık Gıslason, Ion Bodvarsson, Alfred Fınnbogason.

Jańazelandııalyq Mettıý Konger qazylyq etken bul oıynda vıkıngter birinshi bolyp qaqpaǵa qaýip tóndirdi. Sıgýrdssonnyń soqqysyn Ýzoho buryshtamaǵa jiberip úlgerdi. Alǵashqy taım sońyna taman ıslandııalyqtar birneshe múmkindikti múlt jiberdi. Al nıgerııalyqtar shabýyl uıymdastyrýǵa tyrysqanymen, birinshi taımda birde-bir ret qaqpany durys kózdeı almady.

Kezdesýdiń ekinshi kezeńi nıgerııalyqtardyń shabýylymen bastaldy.

Kóp uzamaı ıslandyq oıynshynyń alań syrtynan Nıgerııanyń aıyp alańyna qolmen laqtyrǵan doby ózderiniń soryna shyqty. Dopty qaqshyp alyp, ushqyr shabýylǵa kóshken nıgerııalyqtar vıkıngterdi qapy qaldyrdy. Oń qanattan sýyrylyp shyqqan anglııalyq «Chelsıdiń» jartylaı qorǵaýshysy Vıktor Mozes Islandııanyń aıyp alańyna baryp qalǵan Ahmed Musaǵa pas berdi. Máskeýdiń TsSKA komandasynyń shabýyl ótinde oınaıtyn Ahmed áýeli dopty qabyldap alyp, sodan keıin qaqpa buryshyn dál kózdedi - 1:0. Bul Nıgerııaǵa qýanysh syılaǵan 50-inshi mınýt edi.

Islandııalyqtar alǵa umtylǵanymen, 74-mınýtta A.Musanyń aıyp alańyna kirmesten tepken doby qaqpa mańdaıshasynan keri qaıtty. Іle-shala alystan berilgen pasty qabyldap alǵan Ahmed aıyp alańyna ekpindeı enip, bárin aldap ótip, 75-mınýtta esepti 2:0-ge jetkizdi. Bul onyń ulttyq quramasy sapyndaǵy 15-inshi goly edi.

Bir qyzyǵy, budan tórt jyl buryn Brazılııada ótken dodada A.Musa Argentınanyń qaqpasyna qos gol soqqanymen, onda komandasy 2:3 esebimen jeńilip qalǵan edi. Argentınalyqtarmen birge nıgerııalyqtar toptan shyqqanymen, frantsýzdardan 0:2 esebimen utylǵan bolatyn.

Match aıaqtalýǵa on mınýttaı qalǵanda, ıslandııalyq oıynshyny nıgerııalyqtar óz aıyp alańynda shalyp jyqty. Mettıý Konger beıneqaıtalaýdan keıin Nıgerııanyń qaqpasyna 11 metrlik penaltı belgiledi. Alaıda Gılfı Sıgýrdssonnyń soqqysy qaqpadan joǵary ketti.

Osylaısha Islandııa quramasyn tize búktirgen Nıgerııa úsh upaıǵa ıe boldy. Islandııa men Argentınanyń enshisinde bir-aq upaıdan bar.

Eske sala keteıik,  D tobynda Argentınany oısyrata jeńip, 6 upaıǵa qol jetkizgen Horvatııanyń pleı-off básekesine joldama alǵanyn jazǵan bolatynbyz. Endi ekinshi joldama máselesi 26 maýsym kúni bolatyn Nıgerııa - Argentına, Islandııa - Horvatııa matchtarynda sheshiledi. Argentınalyqtar sońǵy matchta Nıgerııany utyp, ıslandııalyqtar ózderine qajet eseppen horvattardy jeńe almasa, onda Messı komandasy joldamaǵa ıelik  etedi. Dop aıyrmasy eseptelýi de múmkin. Horvattar Islandııamen básekede jeńis nemese teń oıyn úshin bar kúshin sala ma, álde keıinge saqtaı ma, ol da belgisiz.