Fýtboldan ÁCh-2026: Marokko Nıderlandyny eline erterek qaıtardy
ASTANA. KAZINFORM — Búgin fýtboldan 2026 jylǵy álem chempıonatynda pleı-off satysynda Nıderlandy men Marokko kezdesti.
Eýropa qurlyǵynyń ókilderi F tobynda synǵa túsip, úsh kezdesýde jeti upaı jınady. Eki jeńis, bir teń oıynmen birinshi orynǵa taban tiredi.
Al Marokko dál sondaı nátıjemen C tobynda ekinshi orynǵa jaıǵasty.
Qazirge deıin álem chempıonatynda 12-márte baq synap jatqan nıderlandylyq fýtbolshylar 1974, 1978, 2010 jyldary kúmis júldeger atansa, dúbirli dodaǵa 7 márte qatysqan Marokko 2022 jyly tórtinshi orynǵa turaqtady.
Sondyqtan jankúıerler bul kezdesýde tartysty oıyn kútkeni anyq. Qos qurama oıyn barysynda joldama úshin baryn saldy. Soǵan qaramastan birinshi kezeńde esep ashylǵan joq.
Ekinshi kezeńde olar sol qarqynyn báseńdetken joq. Shabýylǵa jıi shyqqan olar gol soǵatyn múmkindikti izdedi. Nátıjesinde gıderlandylyq Kodı Gakpo esep ashsa, 91-mınýtta marokkolyq Issa Dıop tarazy basyn teńestirdi.
Negizgi kezeńde 1:1 esebi tirkelip, oıyn overtaımǵa ulasty. Overtaımda jeńimpaz anyqtalǵan joq. Penaltı serııasynda Marokko jeńiske jetip, 1/8 fınalǵa joldama aldy.
Aıta ketsek, buǵan deıin pleı-off kezeńinde Kanada, Brazılııa, Paragvaı quramalary qarsylastaryn qapy qaldyryp, 1/8 fınalǵa joldama aldy.
Sondaı-aq búgin, 30 maýsymda 22:00–de Kot-d’Ivýar — Norvegııa, 1 shildede 02:00–de Frantsııa — Shvetsııa, 06:00–de Meksıka — Ekvador, 21:00–de Anglııa — Kongo DR, 2 shildede 01:00–de Belgııa — Senegal, 05:00–de AQSh — Bosnııa jáne Gertsogovına jasyl alańǵa shyǵady.
Al 3 shildede 04:00–de Portýgalııa — Horvatııa, 23:00–de Aýstralııa — Egıpet, 4 shildede 03:00–de Argentına — Kabo-Verde, 06:30da Kolýmbııa — Gana kezdesedi.
