Fýtboldan ÁCh-2026: Ózbekstan quramasy alǵashqy kezdesýinde jeńilip qaldy
ASTANA. KAZINFORM - Fýtboldan 2026 jylǵy álem chempıonatynda K tobynda synǵa túsip jatqan Ózbekstan - Kolýmbııa kezdesýi aıaqtaldy.
Dúbirli dodaǵa alǵash ret qatysyp otyrǵan ózbekstandyq fýtbolshylar birinshi oıynda Ońtústik Amerıkanyń tájirıbeli quramasyna jolyqty. Soǵan qaramastan olar bul kezdesýde upaı oljalaýǵa bar kúshin saldy. Dese de oıyn basynan Kolýmbııa quramasy tizgindi óz qolyna ustaýǵa tyrysty. Tolassyz shabýyl uıymdastyryp, gol soǵatyn múmkindikti izdedi. Oǵan ózbekstandyq qorǵaýshylar laıyqty toıtarys berip jatty.
Oıynnyń 42-mınýtynda kolýmbııalyq Danıel Mýnos óz múmkindigin múlt jibergen joq. Ol áriptesi Lýıs Dıastyń bergen pasyn golǵa aınaldyra bildi.
Endigi kezekte Fabıo Kannavaro shákirtteri tarazy basyn teńestirýge umtyldy. Degenmen birinshi kezeńde tablodaǵy esep ózgerissiz qaldy.
Ekinshi kezeńde ózbekstandyq shabýylshy Abbosbek Faızýllaev 60-mınýtta kózdegen nysanadan múlt ketpese, 65-mınýtta Lýıs Dıastyń golynan keıin qaıtadan Kolýmbııa alǵa shyqty.
Al 99-mınýtta kolýmbııalyq Hamınton Kampas qorytyndy esepti belgiledi.
Osylaısha Ózbekstan quramasy qarsylasyna 1:3 esebimen ese jiberdi.
Aıta ketsek, bul toptaǵy Portýgalııa - Kongo Demokratııalyq Respýblıkasy kezdesýinde 1:1 esebi tirkeldi.
Endi 23 maýsymda Ózbekstan quramasy Portýgalııamen kezdesse, 24 maýsymda Kolýmbııa men Kongo DR jasyl alańǵa shyqty.
Sondaı-aq L tobynda Anglııa quramasy Horvatııany 4:2 esebimen jeńse, Gana Panamany 1:0 esebimen jeńdi.
