Fýtboldan ÁCh-2026: Kolýmbııa ekinshi ret jeńip, pleı-off satysyna shyqty
ASTANA. KAZINFORM - Fýtboldan 2026 jylǵy álem chempıonatynda K tobynda Kolýmbııa jáne Kongo Demokratııalyq Respýblıkasy quramalary kezdesti.
Alǵashqy týrda Ózbekstandy 3:1 esebimen jeńgen kolýmbııalyq fýtbolshylar búgin úsh upaı oljalaǵan jaǵdaıda pleı-off satysyna beriletin joldamaǵa bir týr buryn qol jetkizetin edi. Esesine Portýgalııamen 1:1 esebimen teń oınaǵan afrıkalyq fýtbolshylar úshin kem degende teń esep qajet bolatyn.
Kezdesý barysynda qarsylastar alǵashqy mınýttan bir-biriniń qaqpasy mańynda jıi shabýyl uıymdastyrdy. Degenmen dittegen maqsatyna jete almaı jatty. Birinshi kezeńde tablodaǵy esep ózgergen joq.
Ekinshi kezeńde de quramalar dál osyndaı qarqynda oıyndy jalǵastyrdy. Dese de olar bir-biriniń qaqpasynan sańylaý taba almaı jatty.
Oıynnyń 76-mınýtynda kolýmbııalyq Danıel Mýnos óz múmkindigin múlt jibergen joq.
Osylaısha Kolýmbııa qarsylasynan 1:0 esebimen basym túsip, bir týr burıyn pleı-off satysyna joldama aldy.
Aıta ketsek, budan buryn bul topta Portýgalııa quramasy Ózbekstandy 5:0 esebimen oısyrata jeńdi.
Endi bul topta úshinshi týr oıyndary 28 maýsym kúni ótkiziledi. Bul kúni Ózbekstan - Kongo DR, Portýgalııa - Kolýmbııa quramalary oınaıdy.
