Fýtboldan ÁCh-2026: Kanada 1/8 fınalǵa berilgen alǵashqy joldamaǵa ıe boldy
ASTANA. KAZINFORM - Búgin fýtboldan 2026 jylǵy álem chempıonatynda 1/8 fınalyna shyqqan alǵashqy qurama anyqtaldy.
Dop dodasynyń pleı-off satysyndaǵy alǵashqy oıyn Ońtústik Afrıka - Kanada arasynda ótti.
Afrıka qurlyǵynyń ókilderi álem chempıonatyna bıyl tórtinshi márte qatysyp otyr. Qazirge deıin toptyq kezeńnen asa alǵan joq.
Kanadalyq fýtbolshylardyń da jaǵdaıy soǵan uqsas. Osy ýaqytqa deıin bedeldi básekede eki márte baq synaǵanymen toptyq kezeńnen keıin eline erterek qaıtqan edi.
Sondyqtan eki quramanyń da deńgeıi qatarlas. Qaı-qaısysynyń da jarystyń kelesi kezeńine shyǵýyna múmkindigi bar.
Kezdesý barysynda qarsylastar bir-biriniń qaqpasyna jıi shabýyl jasady. Soǵan qaramastan birinshi kezeńde bir-biriniń qaqpasynan sańylaý taba alǵan joq.
Ekinshi kezeńde de oıyn dál osyndaı qarqynda órbidi. Oıynnyń 92-mınýtta kanadalyq Stefen Eýshtakıý tepken dop qaqpa torynda týlap jatty.
Osylaısha Kanada qarsylasynan 1:0 esebimen basym túsip, jarystyń kelesi satysyna shyqty.
Endi olar 4 shildede 1/8 fınalda Nıderland - Marokko jubynyń jeńimpazymen kezdesedi.
Sondaı-aq pleı-off satysynda 29 maýsymda Brazılııa - Japonııa, 30 maýsymda Germanııa - Paragvaı, Nıderland - Marokko, Kot-d'Ivýar - Norvegııa, 1 shildede Frantsııa - Shvetsııa, Meksıka - Ekvador, Anglııa - Kongo DR kezdesedi.
Sonymen qatar 2 shildede Belgııa - Senegal, AQSh - Bosnııa jáne Gertsogovına, 3 shildede Portýgalııa - Horvatııa, Aýstralııa - Egıpet, 4 shildede Argentına - Kabo-Verde, Kolýmbııa - Gana sheberlik baıqasady.
Al 1/8 fınal 4-7 shilde kúnderi ótse, odan keıin 1/4 fınal 9-11 shilde, 1/2 fınal 14-15 shilde kúnderi bolady. Fınal men 3-oryn úshin oıyn 18-19 shilde kúnderine belgilengen.
