Fýtboldan ÁCh-2026: Frantsııa Norvegııany iri eseppen jeńdi
ASTANA. KAZINFORM — Búgin fýtboldan 2026 jylǵy álem chempıonatynyń I tobynda sheshýshi úshinshi týr oıyndary ótti.
Jankúıerler bul toptaǵy Frantsııa — Norvegııa kezdesýin asyǵa kútti. Olardyń kókeıinde alǵashqy eki týrda upaıdan shashý shyǵarmaǵan eki quramanyń qaısysy jeńimpaz atanady degen saýal turǵany ras.
Kezdesý barysynda frantsııalyq fýtbolshylar jyldam gol soǵyp úlgerdi. Oıynnyń 7-mınýtynda Ýsman Dembele esep ashsa, 20-mınýtta ol óziniń ekinshi golynyń avtory atandy.
Odan keıin norvegııalyq Telo Osgor 21-mınýtta esep aıyrmasyn qysqartqan edi. Degenmen Ýsman Dembele qarsylas qaqpasyn taǵy bir márte mazalap, 32-mınýtta het-trık jasap úlgerdi.
Al 94-mınýtta frantsııalyq Dezıre Dýe qorytyndy esepti belgiledi.
Osylaısha Frantsııa qarsylasynan 4:1 esebimen basym túsip, óz tobynda toǵyz upaımen birinshi orynǵa ıe bolady. Odan keıingi orynǵa 6 upaımen Norvegııa jaıǵasty. Eki qurama pleı-off satysyna tikeleı joldama aldy.
Sondaı-aq taǵy bir kezdesýde Senegal men Irak jasyl alańǵa shyqty. Birinshi jáne ekinshi oıynda birde-bir upaıǵa qol jetkize almaǵan olar bul joly kimniń myqty ekenin dáleldeýge tyrysty. Afrıkalyq qurama sapynan Habıb Dıarra 4-mınýtta esep ashty.
Odan keıingi goldar ekinshi taımda soǵyldy. Oıynnyń 56-mınýtynda Ismaıla Sarr 56, Pap Geıe 59, 71, Ilıman Ndaıe 82-mınýtta mergendik tanytty.
Osylaısha afrıkalyq qurama Irakty 5:0 esebimen tize búktirip, 3 upaımen óz tobynda úshinshi oryn aldy. Ázirge senegaldyq fýtbolshylar úshinshi oryn alǵan úzdik quramalar arasynda pleı-off satysyna shyǵý múmkindigin saqtap tur.
Endi 27 maýsymda G jáne H toptarynda úshinshi týr oıyndary ótedi.
Eske salsaq, budan buryn Túrkııa pleı-off satysynan tys qaldy.
