Fýtboldan ÁCh-2022: Qazaqstan men Frantsııa kezdesýin qaıdan kórýge bolady
NUR-SULTAN. QazAqparat - Búgin, 28 naýryzda fýtboldan 2022 jylǵy álem chempıonatyna irikteý satysynda elordada ótetin Qazaqstan jáne Frantsııa quramalary kezdesýi qaı arnadan kórsetiletini belgili boldy, dep habarlaıdy QazAqparat tilshisi.
Aıta keteıik, qazaqstandyq qurama irikteý satysynda D tobynda synǵa túsedi. Qarsylastary - Frantsııa, Ýkraına, Bosnııa jáne Gertsogovına, Fınlıandııa.
Qazaqstan men Frantsııa quramalarynyń kezdesýi «Qazaqstan» jáne «Qazsport» telearnalary arqyly tikeleı efırde kórsetiledi. Ulttyq arnada Amangeldi Seıithan jáne Ýálıhan Qosanbaı kommentator bolady. Al «Qazsport» efırin Ersin Erik pen Dıdar Kadyrov júrgizedi.
Oıyn karantın talabyna baılanysty jankúıersiz ótedi. Tikeleı kórsetilim elorda ýaqytymen 18.50-de bastalady.
Frantsııa quramasynyń bas bapkeri Dıde Desham Qazaqstanmen kezdesýine qatysýǵa múmkindigi bar oıynshylar tizimin jarııalady. Onda Anglııanyń «Chelsı» klýbynyń jartylaı qorǵaýshysy Ngolo Kanteden ózge juldyzdardyń barlyǵy bar.
Atalǵan oıynda belarýstik maman Alekseı Kýlbakov bas tóreshi retinde qyzmet atqarady. Oǵan sol elden kelgen Dmıtrıı Jýk pen Oleg Maslıanko kómekshi bolady . Qosalqy tóreshi - Vıktor Shımýsık.
Bizdiń fýtbolshylarǵa Frantsııa Eýropada kezdesip otyrǵan 38-shi qarsylasy atanbaq. Ázirge qazaqstandyqtar olardan ózge Bosnııa men Gertsegovına, Gıbraltar, Izraıl, Ispanııa, Italııa, Kosovo, Lıhtenshteın, Lıýksembýrg, Norvegııa, Soltústik Irlandııa, Soltústik Makedonııa, Slovakııa, Slovenııa, Ýels jáne Shveıtsarııa quramalarymen kúsh synasyp kórgen joq.
Oǵan deıin Azııa qurlyǵynda dop tepken Qazaqstan UEFA quramyna 2002 jyly qabyldandy. Sodan beri álem chempıonatynda 60 oıyn ótkizgen. Onyń ishinde 12-sinde jeńiske jetip, 11-inde teń tússe, 37-sinde qarsylasyna ese jiberdi.
