Fýtboldan ÁCh-2022: Qazaqstan quramasynyń qarsylastary teń tústi
NUR-SULTAN. QazAqparat - Fýtboldan 2022 jylǵy álem chempıonatyna irikteý satysynda Qazaqstan quramasy synǵa túsetin D tobynda taǵy bir kezdesý aıaqtaldy, dep habarlaıdy QazAqparat tilshisi.
Óz alańynda Ýkraına quramasy Fınlıandııamen sheberlik baıqasty. Ekeýi de alǵashqy týrda teń nátıjege qanaǵat bildirdi. Ýkraınalyqtar syrt alańda Frantsııamen 1:1, Fınlıandııa óz alańynda Bosnııa jáne Gertsogovınamen 2:2 esebimen teń tústi.
Sondyqtan búgingi oıynda qos qurama jeńiske jetý jolyn izdedi. Dese de birinshi kezeńde qos qarsylas bir-biriniń qaqpasynan sańylaý taba alǵan joq.
Ekinshi kezeńde de oıyn alma-kezek shabýylmen órbidi. Nátıjesinde 80-mınýtta ýkraına quramasy sapynan Jýnıor Moraes esep ashsa, fınlıandııalyq Tezmý Pýkkı 89-mınýtta penaltıden gol soqty. Osylaısha kezdesý 1:1 esebimen teń aıaqtaldy.
Eki týrdan keıin Frantsııa quramasy tórt upaımen kósh basynda tur. Odan keıingi oryndardaǵy Ýkraına men Fınlıandııanyń enshisinde eki-ekiden upaı bolsa, Bosnııa jáne Gertsogovına ázirge bir upaıdy mise tutqan. Al Qazaqstan ázirge upaı enshilegen joq.
Esterińizge sala ketelik, búgin atalǵan topta Qazaqstan óz alańynda Frantsııadan 0:2 esebimen jeńilip qaldy.
Endi 31 naýryzda bul topta taǵy eki oıyn ótkiziledi. Óz alańynda Ýkraına Qazaqstandy qabyldasa, Bosnııa jáne Gertsogovına Frantsııamen sheberlik baıqasady.
