Fýtboldan ÁCh-2022: Qazaqstan quramasy Ýkraınadan ese qaıtara ala ma
NUR-SULTAN. QazAqparat - Búgin, 31 naýryzda fýtboldan 2022 jylǵy álem chempıonatyna irikteý satysyndaǵy ekinshi oıynynda Qazaqstan quramasy syrt alańda Ýkraınamen kezdesedi, dep habarlaıdy QazAqparat tilshisi.
Aıta keteıik, qazaqstandyq qurama irikteý satysynda D tobynda synǵa túsedi. Qarsylastary - Frantsııa, Ýkraına, Bosnııa jáne Gertsogovına, Fınlıandııa.
Alǵashqy týrda Ýkraına syrt alańda Frantsııamen, odan keıin óz alańynda Fınlıandııamen 1:1 esebimen teń oınady.
Al Qazaqstan birinshi týrǵa qatysqan joq. Al ekinshi týrda óz alańynda Frantsııadan 0:2 esebimen jeńilip qaldy.
FIFA jarııalaǵan sońǵy reıtıngte Frantsııa 24-orynda tur. Al Qazaqstan onda 122-orynda keledi.
Qazaqstan men Ýkraına quramasy buǵan deıin tórt márte kezdesti. Olardyń barlyǵynda qarsylasymyzdyń mereıi ústem boldy.
Eki qurama aldymen 2006 jylǵy álem chempıonatyna irikteý satysynda jolyqty. 2004 jyldyń 8 qyrkúıeginde Almatyda ótken oıynda aldymen ýkraındar sapynan Alekseı Belık 14-mınýtta esep ashty. Odan keıin 34-mınýtta qazaqstandyq Andreı Karpovıch tarazy basyn teńestirdi. Jeńis golyn Rýslan Rotan 90-mınýtta soǵyp, Ýkraına quramasy 2:1 esebimen jeńiske jetti.
Odan keıin qos qurama 2005 jyldyń 4 maýsymynda Kıevte taǵy bir márte sheberlik baıqasty. Bul joly Ýkraına quramasynyń qazirgi bas bapkeri Andreı Shevchenko 18-mınýtta esep ashsa, 83-mınýtta qazaqstandyq Igor Avdeev óz qaqpasyna gol soǵyp aldy. Osylaısha ýkraındar 2:0 esebimen basym tústi.
Quramalar 2010 jylǵy álem chempıonatynda taǵy bir topqa tústi. 2008 jyly 10 qyrkúıekte Almatyda ótken kezdesýde ýkraınalyq fýtbolshylar 3:1 esebimen jeńip ketti. Bul oıynda olardyń sapynan ıÝrıı Nazarenko 45, 80, Andreı Shevchenko 54-mınýttarda mergendik tanytsa, oǵan 68-mınýtta qazaqstandyq Sergeı Ostapenko bir golmen jaýap qaıyrdy.
2010 jyldyń 10 maýsymynda qazaqstandyqtar atalǵan qarsylasyna 1:2 esebimen jol berdi. Bul oıynda qazaqstandyq Tańat Nóserbaev 19-mınýtta esep ashty. Alaıda, odan keıin qazaqstandyq qurama qaqpasyna ýkraınalyq ıÝrıı Nazarenko 33, 47-mınýtta eki gol soǵyp ketti. Osylaısha tórt oıyn boıy qazaqstandyq qurama atalǵan qarsylasynan ese qaıtara almaı keledi.
Qazaqstan men Ýkraına quramalary arasyndaǵy kezdesý elorda ýaqytymen 00.35-te bastalyp, «Qazsport» telearnasynan tikeleı efırde kórsetiledi.
Atalǵan oıynda slovenııalyq Mateı ıÝg bas tóreshi qyzmetin atqarady. Oǵan sol elden kelgen Mateı Jýnıch pen Grega Kordej kómekshi bolady. Qosalqy tóreshi de - slovenııalyq Slavko Vınchıch.
Sondaı-aq, búgin elorda ýaqytymen 00.45-te Bosnııa jáne Gertsogovına óz alańynda Frantsııany qabyldaıdy.
