Fýtboldan ÁCh-2022: Qazaqstan-Frantsııa kezdesýinde alǵashqy mınýtta alańǵa kimder shyǵady
NUR-SULTAN. QazAqparat - Búgin, 28 naýryzda fýtboldan 2022 jylǵy álem chempıonatyna irikteý satysynda elordada ótetin Qazaqstan jáne Frantsııa kezdesýinde eki qurama sapynda alǵashqy mınýttan jasyl alańǵa shyǵatyn oıynshylar belgili boldy, dep habarlaıdy QazAqparat tilshisi.
Frantsııa sapynda qaqpashy Ýgo Lorıs, qorǵaýshylar - Lıýka Dın, Kleman Langle, Kýrt Zýma, Leo Dıýbýa, jartylaı qorǵaýshylar - Tangı Ndombele, Pol Pogba, shabýylshylar - Antonı Marsııal, Antýan Grızmann, Toma Lemar, Ýsman Dembele oıyn kórsetedi.
Al Qazaqstan quramasynyń negizgi quramyna qaqpashy Vleksandr Mokın, qorǵaýshylar - Marat Bystrov, Temirlan Erlanov, Sergeı Malyı, Nuráli Álip, jartylaı qorǵaýshylar - Rýslan Valıýllın, Serikjan Mýjıkov, Ashat Taǵybergen, Vladıslav Vasılev, Azat Nurǵalıev, shabýylshy - Maksım Fedın ilikti.
Aıta keteıik, qazaqstandyq qurama irikteý satysynda D tobynda synǵa túsedi. Qarsylastary - Frantsııa, Ýkraına, Bosnııa jáne Gertsogovına, Fınlıandııa.
Bizdiń fýtbolshylarǵa Frantsııa Eýropada kezdesip otyrǵan 38-shi qarsylasy atanbaq.
Qazaqstan men Frantsııa quramalarynyń kezdesýi «Qazaqstan» jáne «Qazsport» telearnalary arqyly tikeleı efırde kórsetiledi. Ulttyq arnada Amangeldi Seıithan jáne Ýálıhan Qosanbaı kommentator bolady. Al «Qazsport» efırin Ersin Erik pen Dıdar Kadyrov júrgizedi.
Oıyn karantın talabyna baılanysty jankúıersiz ótedi. Tikeleı kórsetilim elorda ýaqytymen 18.50-de bastalady.
Atalǵan oıynda belarýstik maman Alekseı Kýlbakov bas tóreshi retinde qyzmet atqarady.
