Fýtboldan ÁCh-2022: Alǵashqy kezdesýge bas tóreshi belgilendi

ASTANA. QazAqparat - Fýtboldan 2022 jylǵy álem chempıonatyndaǵy alǵashqy kezdesýde qyzmet atqaratyn tóreshi belgilendi, dep habarlaıdy QazAqparat tilshisi.

Bul mindetti ıtalıandyq tóreshi Danıele Orsato atqarady. Týrnırdiń alǵashqy oıynynda Katar jáne Ekvador quramalary kezdesedi.

Aıta ketsek, atalǵan mindet 46-jastaǵy arbıtrge álem chempıonatynda bas tóreshi retinde tuńǵysh márte júktelip otyr. Ol 2018 jylǵy álem chempıonatynda VAR boıynsha tóreshiniń kómekshisi boldy.

Budan bqryn ol Eýro-2020 týrnırinde úsh oıynda jáne 2019/20 jylǵy Chempıondar lıgasy týrnıriniń fınalynda qyzmet atqardy. Atalǵan fınalda Germanııanyń «Bavarııa» komandasy Frantsııanyń «Parı Sen-Jermen» klýbyn 1:0 esebimen jeńgen edi.

Katar jáne Ekvador kezdesýi 20 qarashada 22:00-de bastalyp, «Qazsport» telearnasynan tikeleı efırde kórsetiledi.