Fýtboldan 2029 jylǵy klýbtar arasyndaǵy álem chempıonatyna qatysatyn tórt komanda anyqtaldy

ASTANA. KAZINFORM - .Dúbirli doda jaqynda AQSh-ta ótken atalǵan týrnırdiń erejesi negizinde ótkiziledi.

Oǵan barlyǵy 32 komanda qatysady. Aldyn-ala esep boıynsha bedeldi báseke sol jyldyń maýsym-shilde aılaryna belgilenip otyr. 

Mundaı múmkindikke bıyl Chempıondar lıgasynda bas júldege ıe bolǵan Frantsııanyń «Parı Sen-Jermen» komandasy qol jetkizdi. Sondaı-aq Azııadan «Al-Ahlı» (Saýd Arabııasy), Afrıkadan «Pıramıda» (Mysyr), Soltústik Amerıkadan «Krýs Asýl» (Meksıka) joldama ıegeri atandy. Olardyń barlyǵy óz qurlyǵyndaǵy basty fýtbol týrnırinde jeńis tuǵyryna kóterilgen. Aldaǵy ýaqytta olardyń qataryn atalǵan týrnırde jeńimpaz atanǵan komandalar tolyqtyrady.

Ázirge bedeldi básekeniń qaı elde ótetini belgisiz. Ony uıymdastyrýǵa nıet bildirgen memleketterdiń qatarynda Qatar aldyńǵy orynda tur. Onda 2022 jylǵy quramalar arasyndaǵy álem chempıonaty bolǵan toǵyz stadıon saqadaı-saı tur. Onyń altaýynda qazir ishki birinshilik oıyndary ótip júr. Degenmen olardyń mundaı usynysyna klımattyq jaǵdaıy kedergi keltirýi múmkin. Bul jaǵdaıda klýbtar arasyndaǵy álem chempıonatyn qysqy mezgilde ótkizýge týra keledi. Oǵan komandalardyń oıyn kestesi sáıkes kelmeıdi.

Sondaı-aq Ispanııa, Portýgalııa jáne Marokko klýbtar arasyndaǵy álem chempıonatyn ótkizýge nıet bildirdi. Bul memleketterde 2030 jyly quramalar arasyndaǵy álem chempıonaty bolady.

Oǵan qosa dúbirli doda Brazılııa, Aýstralııa jáne AQSh-ta ótýi múmkin. naqty sheshim aldaǵy ýaqytta qabyldanady. 

Aıta ketsek, bıyl klýbtar arasyndaǵy álem chempıonatynda Anglııanyń «Chelsı» komandasy bas júldege ıe boldy.