Fýtboldan 2022 jylǵy álem chempıonatynyń jerebesi 1 sáýirde tartylady
NUR-SULTAN. QazAqparat - Fýtboldan 2022 jylǵy álem chempıonatynyń fınaldyq satysynyń jerebesi 1 sáýirde tartylady, dep habarlaıdy QazAqparat tilshisi.
Dúbirli doda bıylǵy jyldyń 21 qarashasy men 8 jeltoqsany aralyǵynda Katarda ótedi.
Eske salsaq, qazirge deıin oǵan 20 qurama joldama alyp úlgergen. Olardyń qatarynda alań ıesi – Katar, Eýropa elderinen – Germanııa, Danııa, Frantsııa, Belgııa, Horvatııa, Ispanııa, Serbııa, Anglııa, Shveıtsarııa, Nıderlandy, Ońtústik Amerıkadan – Brazılııa, Argentına, Ýrýgvaı, Ekvador, Soltústik Amerıkadan – Kanada, Azııa memleketterinen – Iran, Ońtústik Koreıa, Japonııa, Saýd Arabııasy quramalary shyqqan bolatyn.
Álem chempıonatynyń fınaldyq satysynyń jerebesi 1 sáýirde Katar astanasy – Doha qalasynda ótedi.
Bul ýaqytta 32 quramanyń 29-y anyqtalady. Odan keıingi ýaqytta Ońtústik Amerıka, Azııa, Soltústik Amerıka jáne muhıt aımaǵynan tórt qurama qurlyqaralyq ótpeli saıysta taǵy eki joldamaǵa talasady.
Al Eýropa qurlyǵynda álem chempınaty ótpeli saıysynda bir oıynmen Shotlandııa men Ýkraına jeńimpazy anyqtalady. Bul oıyn shamamen maýsym aıyna belgilengen. Jeńimpazy sol aıda Ýelspen taǵy bir joldamany sarapqa salady.
Saltanatty shara elorda ýaqytymen 22.00-de bastalyp, «Qazsport» telearnasynan tikeleı efırde kórsetiledi.
Eske salsaq, Kanada fýtbolshylary 36 jyldan keıin álem chempıonatynyń fınalyna shyqty.
