Fýtboldan 2022 jylǵy álem chempıonatynyń resmı doby tanystyryldy
NUR-SULTAN. QazAqparat - Fýtboldan 2022 jylǵy álem chempıonatynyń resmı doby tanystyryldy, dep habarlaıdy QazAqparat tilshisi.
Atalǵan dop «Al Rihla» degen ataýǵa ıe. Ol arab tilinen aýdarǵanda «Saıahat» degen maǵynany bildiredi. Doptaǵy órnekter Katar eliniń arhıtektýrasy, tili men mádenıetiniń negizinde jasalǵan.
Eske salsaq, buǵan deıin oǵan 27 qurama joldama alyp úlgerdi. Olardyń qatarynda alań ıesi – Katar, Eýropa elderinen – Germanııa, Danııa, Frantsııa, Belgııa, Horvatııa, Ispanııa, Serbııa, Anglııa, Shveıtsarııa, Nıderlandy, Portýgalııa, Polsha, Ońtústik Amerıkadan – Brazılııa, Argentına, Ýrýgvaı, Ekvador, Soltústik Amerıkadan – Kanada, Azııa memleketterinen – Iran, Ońtústik Koreıa, Japonııa, Saýd Arabııasy, Afrıkadan – Kamerýn, Marokko, Týnıs, Gana, Senegal quramalary bar.
Endi Eýropa qurlyǵynda álem chempınaty ótpeli saıysynda bir oıynmen Shotlandııa men Ýkraına jeńimpazy anyqtalady. Kezdesý shamamen maýsym aıyna belgilengen. Jeńimpazy sol aıda Ýelspen taǵy bir joldamany sarapqa salady.
Odan keıin Ońtústik Amerıka, Azııa, Soltústik Amerıka jáne muhıt aımaǵynan tórt qurama qurlyqaralyq ótpeli saıysta taǵy eki joldamaǵa talasady.
Álem chempıonatynyń fınaldyq satysynyń jerebesi 1 sáýirde Katar astanasy – Doha qalasynda ótedi.
Dúbirli doda bıylǵy jyldyń 21 qarashasy men 8 jeltoqsany aralyǵynda Katarda bolady.
