Fýtboldan 2022 jylǵy álem chempıonatynyń oıyn kestesi jarııalandy
NUR-SULTAN. QazAqparat - FIFA fýtboldan 2022 jyly Katarda ótetin álem chempıonatynyń oıyn kestesi jarııalandy, dep habarlaıdy QazAqparat tilshisi.
Toptyq kezeńniń alǵashqy oıyny 21 qarasha kúni Ál-Hor qalasyndaǵy «Ál-Baıt» stadıonynda ótkiziledi. Kezdesý jarys qojaıyny - Katar jáne dúbirli dodada A tobynda synǵa túsetin qurama arasynda bolady. Bul arena 60 myńnan astam jankúıerge arnalǵan. Onda toptyq kezeńdegi jáne jartylaı fınaldaǵy bir oıyn bolady.
Toptyq kezeńdegi oıyndar 12 kúnge sozylady. Dúbirli dodaǵa joldama alǵan quramalar 21 qarasha men 2 jeltoqsan aralyǵynda toptyq kezeńde synǵa túsedi. Ár kúnde tórt oıynnan ótkiziledi. Oıyndar elorda ýaqytymen 16.00, 19.00, 22.00, 01.00-de bolady. Al úshinshi týr men pleı-off oıyndary elorda ýaqytymen 21.00, 01.00-de ótkiziledi.
Al quramalar 1/8 fınalda 3-6, shırek fınalda 9-10 jeltoqsan kúnderi ózara kezdesedi. Jartylaı fınal 13 jáne 14 jeltoqsanǵa josparlanǵan. Fınal 18 jeltoqsanda Lýsaıl qalasyndaǵy 86 myń adamdy qabyldaı alatyn ulttyq stadıonda bolady.
Budan buryn Chempıondar lıgasy shırek fınalynyń jerebesi tartyldy.
