Fýtboldan 2010 jylǵy Álem chempıonaty kórsetiliminiń demeýshisi sport jýrnalısteri arasynda konkýrs jarııalady
ALMATY. Maýsymnyń 15-i. QazAqparat /Názıra Eleýhan/ - Álem chempıonatynyń matchtaryn QR aýmaǵynda kórsetýdiń («Habar» jáne «El arna» telearnalary) demeýshisi bolǵan Alıans Banki qazaqstandyq basylymdardyń sport taqyrybyna jazatyn tilshileri arasynda mýndıal kórsetilimderi týraly baıandaýǵa konkýrs jarııalady.
Baıqaý júldesi - osy jyldyń 27 tamyzynda Lýı ІІ stadıonynda Inter (Chempıondar Lıgasynyń jeńimpazy) jáne Atletıko (Eýropa Lıgasynyń jeńimpazy) toptarynyń ÝEFA Sýperkýbogy úshin oınalatyn matchqa joldama, dep habarlaıdy QazAqparat.
Demeýshilerdiń aıtýynsha, joldamadaǵy avıabıletter, qonaqúı, matchqa bılet qarjysy bank tarapynan tólenetin bolady.
"Konkýrstyń maqsaty - qazaqstandyq qoǵamnyń sportqa jáne salaýatty ómir saltyna yqylasyn arttyrý, azamattardyń nazaryn iri halyqaralyq jarystardyń kórsetilimin uıymdastyrý máselelerine kóbirek aýdarý", deıdi baıqaýdy uıymdastyrýshylar.
Konkýrs sharttary boıynsha, baıqaý tek, «2010 jylǵy Álem chempıonatynyń kórsetilimderin úzdik baıandaý» atalymy boıynsha ǵana ótkiziledi, árbir qatysýshy memlekettik jáne (nemese) orys tilinde respýblıkalyq BAQ-ta jarııalaǵan (efırge shyǵarǵan) materıaldarynyń shekteýsiz sanyn usyna alady, baıqaýǵa 2010 jyldyń 11 maýsymynan 19 shildesine deıingi aralyqta jarııalanǵan (efırge shyqqan) materıaldar qabyldanady. Basty shart - barlyq materıaldar Álem chempıonaty oıyndaryn kórsetý máselelerine tikeleı qatysty bolýy tıis.
Baıqaý shilde aıynyń 23-ne deıin ótkiziledi.
Qatysýǵa ynta bildirgender baıqaýdyń tolyq ótkizý tártibimen www.alb.kz saıtyndaǵy «Medıa-ortalyq» bóliminde tanysa alady.
Júlde «Alıans Banki» AQ qyzmetkerlerinen jasaqtalǵan qazylar alqasynyń sheshimimen berilmek.
