Fýtbol: Jýrnalıster kúnine oraı ótken týrnırde «Habar» komandasy jeńimpaz atandy
ASTANA. 29 maýsym. QazAqparat -. - Búgin Astana qalasynda Jýrnalıster kúnine oraı "Alataý" sport kesheninde "Qazkontent" AQ uıymdastyrýymen ótken dástúrli fýtbol týrnırinde «Habar» agenttiginiń jýrnalısteri Bas júldege ıe boldy.
Al ekinshi oryndy «Astana aqshamy» gazetiniń tilshileri enshilese, «24.kz» telearnasynyń komandasy úshinshi oryndy ıemdendi, dep habarlaıdy Baq.kz.
Bul básekede «Habar» agenttigi», «24.kz», «Qazaqstan» ulttyq arnasy, «Kerekınfo» portaly, «Astana aqshamy» gazeti, «Qazaq radıosy», «Qazmedıa» ortalyǵy, «Qazkontent» AQ sekildi 8 komanda baq talastyrdy.
Aqtyq synǵa joldama alǵan «Habar» men «Astana aqshamy» komandalary tartysty oıyn órnegin kórsetti. Belgilengen ýaqyt aralyǵynda qos komanda teń túsip (2:2), myqtyny anyqtaý úshin penaltı belgilendi. Munda «Habardyń» jigitteri óz mergendikterin baıqatyp, 3:2 esebimen Bas júldeni qanjyǵalaryna baılady.
Jalpy, barlyq komanda múshelerine týrnırdiń ótýine atsalysyp, jeńiske degen jigerlilik tanytqandary úshin «Qazkontent» AQ daıyndaǵan arnaıy syılyqtar úlestirildi. Al erekshe óner kórsetken «Úzdik oıynshy» retinde «Habar» agenttiginiń qyzmetkeri Ershat Qojataev tanylsa, «Úzdik qaqpashy» ataǵy "24.kz" telearnasynyń mamany Maqsat Slambekovke buıyrdy.
