Fýtbol: «Jetisý» «Turandy» oısyrata utty
NUR-SULTAN. QazAqparat – Fýtboldan Qazaqstan chempıonatynyń ekinshi týrynda taldyqorǵandyq «Jetisý» Almatydaǵy «Jas qyran» stadıonynda Túrkistannyń «Turan» komandasyn qabyldady, dep habarlaıdy QazAqparat tilshisi.
Taldyqorǵandyqtar ótken jylǵy birinshilikte úzdik altylyqty túıindese, túrkistandyqtar premer-lıgaǵa bıyl qosylǵan edi.
Birinshi týrda «Jetisý» el chempıony «Qaıratqa» 0:2 esebimen ese jiberse, «Turan» óz alańynda «Astanamen» teń túsken-di – 2:2.
Bul joly alań ıeleri oıyn tizginin birden qolǵa alyp, 4-mınýtta buryshtamadan berilgen doptan keıin estonııalyq jartylaı qorǵaýshy Artem Dmıtrıev esep ashty.
Jaqsy oıyn órnegin kórsetken «Jetisý» fýtbolshylarynyń budan keıin de gol soǵatyndaı múmkindikteri boldy. Aqyry 69-mınýtta Aslan Ádil mergendik tanytsa, jeti mınýttan keıin Ashat Baltabekov esepti 3:0-ge jetkizdi.
Budan soń túrkistandyqtar qanshama tyrysqanymen, eshteńe ózgergen joq. «Jetisý» iri eseppen jeńiske jetti.
Búgin ekinshi týrda sondaı-aq «Aqjaıyq» - «Atyraý», «Shahter» - «Ordabasy», «Aqtóbe» - «Tobyl» matchtary ótedi.
Eske sala keteıik, budan buryn «Astananyń» ekinshi orynǵa kóterilgenin jazǵan bolatynbyz.
