Fýtbol: «Jetisý» men «Aqjaıyq» komandalary teń oınady
TALDYQORǴAN. QazAqparat - Fýtboldan el birinshiliginiń kezekti týrynda Taldyqorǵannyń «Jetisý» komandasy óz alańynda «Aqjaıyqty» qabyldady, dep habarlaıdy QazAqparat tilshisi.
Oıyn barysynda qos komanda alma-kezek shabýyldaýǵa tyrysyp baqty. Degenmen alań ıeleri birinshi bolyp esep ashty. 33-mınýtta Raýl Djalılov ábjildik tanytyp, «Jetisý» klýbyn alǵa shyǵardy.
Ekinshi taımda oraldyqtar da baryn saldy. 70-mınýtta Latvııa ulttyq quramasynyń oıynshysy Artýr Karashaýsks aıyp alańynda óz sheberligin kórsetip, tarazy basyn teńestirdi.. Bul onyń «Aqjaıyq» sapyndaǵy alǵashqy goly edi.
Osylaısha oraldyqtar ekinshi match qatarynan 1:1 esebimen teń oınady. Ýkraınalyq maman Sergeı Zaıtsevtiń shákirtteri 25 upaımen ázirshe altynshy orynǵa kóterildi.
Búgin sondaı-aq «Atyraý» men «Qaısar», «Aqtóbe» men «Astana» komandalary ózara kezdesýde.
