Fýtbol: Japonııa jeńilse de, kelesi aınalymǵa ótti
ASTANA. QazAqparat - Fýtboldan 2018 jylǵy Álem chempıonaty toptyq kezeńiniń qorytyndy týry ótti. N tobynda Polsha men Japonııa quramalary kezdesti, dep habarlaıdy QazAqparat tilshisi.
Oıyn basynda japonııalyqtar belsendi kórindi. Ásirese, Takası Ýsamıdiń soqqylary polıak qaqpashysy Lýkash Fabıanskııdiń ábden mazasyn qashyrdy. Jyldam shabýyldardyń birinde Sıbasakı urymtal tusqa shyqqan. Alaıda, onyń jolyna eýropalyqtar bóget boldy. Birinshi taım sońyna qaraı Endjeıchık-Levandovskı-Bereshınskı úshtigi Japonııanyń aıyp alańyna bettegen. Biraq, sońǵysy dopty óz yrqyna baǵyndyra almady.
Al kezdesýdiń ekinshi bóligi Polsha quramasynyń basymdyǵymen ótti. 59-mınýtta olar aıyp dobyn tebýge múmkindik aldy. Rafal Kýjavanyń asyrǵan pasyna polıak qorǵaýshysy ıAn Bednarek birinshi jetip, qarsylas qaqpasynyń toryn týlatty.
Aıta keteıik, qorǵaýshy osy oıyndaǵy ǵana emes, óziniń ulttyq quramasyndaǵy birinshi golyn soqty. Bul shabýylǵa «Kúnshyǵys eliniń» úzdikteri Iosıda men Inýı qarymta jaýap qaıtarǵan. Degenmen, olarǵa dáldik jetispeı jatty.
Tóreshi qosqan qosymsha mınýttarda aıtarlyqtaı ózgerister bolǵan joq. Japonııa quramasy utylyp qalsa da, Kolýmbııa quramasymen qatar kelesi aınalymǵa ótti.
