Parıjde fýtbol jankúıerleri búlik shyǵaryp, 100-den astam adam qamaýǵa alyndy
ASTANA. KAZINFORM — Parı Sen-Jermen komandasy Mıýnhenniń «Bavarııasyna» qarsy matchta teń oıyn kórsetip, Chempıondar lıgasynyń fınalyna shyqty. Bul jeńis jappaı merekeleýge ulasyp, keıin polıtsııamen qaqtyǵysqa sebep boldy, dep jazdy Bild.
«Park de Prens» stadıony mańynda jáne Elıseı alańynda jankúıerler men quqyq qorǵaý kúshteri arasynda qaqtyǵystar tirkeldi. Nátıjesinde polıtsııa 127 adamdy qamaýǵa aldy, quqyq qorǵaý organdarynyń 23 qyzmetkeri jeńil jaraqattandy.
Parıj órt sóndirý qyzmeti 67 qoqys jáshiginiń jáne úsh avtokóliktiń órtengenin habarlady. Elıseı alańynda jınalýǵa resmı tyıym salynǵanyna qaramastan, myńdaǵan jankúıer kóshelerdi toltyryp, jandarmerııa kózden jas aǵyzatyn gaz qoldanýǵa májbúr boldy.
Frantsııa Іshki ister mınıstrliginiń dereginshe, tártipsizdikter kezinde 11 turǵyn zardap shekken, olardyń biri pırotehnıkany abaısyz qoldaný saldarynan aýyr jaraqat alǵan.
Parıj polıtsııasynyń basshysy Loran Nýnes oqıǵalarǵa qaramastan, byltyrǵy jylmen salystyrǵanda tártipsizdikter aýqymy aıtarlyqtaı az bolǵanyn aıtty. Degenmen, bılik fınal kúni qaýipsizdik sharalaryn kúsheıtetinin málimdedi.
Eske sala keteıik, fýtboldan UEFA Chempıondar lıgasy jartylaı fınalynyń alǵashqy oıynynda «Parı Sen-Jermen» (Frantsııa) — «Bavarııa» (Germanııa) komandalary kezdesti. Eki komanda tartysty oıyn ótkizdi.
