Fýtbol jankúıerleri kútken sát: 2026 jylǵy álem chempıonatynyń ashylý saltanaty ótip jatyr

2026 jylǵy fýtboldan álem chempıonatynyń ashylý rásimi Mehıko qalasynda alǵashqy matchtyń bastalýyna 90 mınýt qalǵanda ótti.

FIFA aýqymdy mýzykalyq shoý uıymdastyrdy. Onyń kórkemdik jáne vızýaldyq tujyrymdamasyna Olımpıada oıyndarynyń saltanatty rásimderin qoıýshy Marko Balıch jaýap beredi. Meksıkalyq shoýdyń negizgi ıdeıasy dástúrli papel picado (órnekti qaǵaz) óneri men ulttyq folklordan shabyt alǵan.

Italııalyq opera ánshisi Andrea Bochellı frantsýz dıdjeıi Davıd Getta, amerıkalyq reper Megan Thee Stallion jáne ánshi EJAE-men birge týrnırdiń DNA («DNQ») atty resmı ánuranyn jandy daýysta oryndaıdy.

Al Shakıra men nıgerııalyq ánshi Burna Boy álem chempıonatynyń Dai Dai atty resmı ánin alǵash ret stadıon sahnasynda tanystyrady. Olarǵa Ýgandanyń Ghetto Kids bı toby qosylady.

Latynamerıkalyq mádenıettiń jarqyn kórinisi retinde meksıkalyq áıgili Maná rok-toby, ánshiler J Balvin, Danny Ocean, Belında, Alehandro Fernandes, Lıla Daýns jáne Los Ángeles Azules toby sahnaǵa shyǵady. Al ońtústikafrıkalyq ánshi Tyla óz eliniń memlekettik ánuranyn oryndaıdy.

Merekelik keshti Gollıvýd juldyzy Salma Haıek ashyp, jankúıerlerge arnaýly quttyqtaý joldaıdy.

Qazaqstan ýaqyty boıynsha 12 maýsym túngi saǵat 00:00–de Mehıkoda álem chempıonatynyń alǵashqy matchy bastalady.

Qazaqstan aýmaǵynda týrnır oıyndary Qazsport jáne Qazaqstan telearnalarynan tikeleı efırde kórsetiledi. Kezdesýlerdiń basym bóligi elimizde túngi nemese tańǵy ýaqytta ótedi.

Álem chempıonatynyń alǵashqy oıynynda Meksıka men Ońtústik Afrıka Respýblıkasy quramalary kezdesedi. Bul 2010 jylǵy álem chempıonatynyń ashylý matchynyń qaıtalanýy bolmaq. Ol kezde komandalar 1:1 esebimen teń túsken edi. Al áıgili «Atsteka» stadıony tarıhta úshinshi ret álem chempıonatyn qabyldaǵan alǵashqy arena atanady.

Alǵashqy oıyn kúni Ońtústik Koreıa men Chehııa quramalarynyń matchymen aıaqtalady. Kezdesý Meksıkanyń Gvadalahara qalasyndaǵy (Sapopan) «Akron» (Estadio Akron) stadıonynda ótedi. Qazaqstan ýaqyty boıynsha oıyn 12 maýsym kúni tańǵy saǵat 07:00-de bastalady.

Buǵan deıin qazaqstandyqtar 2026 jylǵy fýtboldan álem chempıonatynda kimge jankúıer bolatynyn jazdyq.