Fýtbol: Jaqyp Qojamberdi ulttyq quramada oınaıtyn bolady
ASTANA. QazAqparat - Fýtboldan ulttyq quramanyń jattyqtyrýshylar shtaby Jaqyp Qojamberdini shaqyrtý týraly sheshim qabyldady. Aıta keterligi, shveıtsarııalyq «Grasshopperdiń» jartylaı qorǵaýshysy Aleksandr Merkel jaraqat alyp, ulttyq qurama sapynda oınaı almaıtyny belgili bolǵan edi. Endi ony Jaqyp Qojamberdi almastyratyn bolady.
Bul týraly Qazaqstan fýtbol federatsııasynyń baspasóz qyzmetinen habarlandy.
Aıta keteıik, 23 jastaǵy «Tarazdyń» jartylaı qorǵaýshysy Jaqyp Qojamberdi tek byltyrǵy jyldyń aqpanynda ǵana alǵash ret ulttyq quramanyń qatarynda óner kórsetip, onda Moldovaǵa qarsy matchta oıynshyny almastyryp alańǵa shyqqan bolatyn. Bıylǵy maýsymda Jaqyp Qojamberdi Qazaqstannyń Premer-Lıgasynda 3 match ótkizse, onyń bireýinde nátıjeli pas berýmen kózge túsken.
Eske sala keteıik, Qazaqstannyń ulttyq quramasy 28-naýryzda EÝRO-2016 irikteý týrnıri aıasynda Islandııaǵa qarsy oınaıtyn bolady.
