Fýtbol: Zaınýtdınovtiń komandasy Reseı chempıonatynda jeńiske jetti
NUR-SULTAN. QazAqparat - Qazaqstandyq Baktıer Zaınýtdınov oınaıtyn «Rostov» komandasy óz alańynda «Ýraldy» (Ekaterınbýrg) utty, dep habarlaıdy QazAqparat tilshisi.
Dondaǵy Rostovta ótken qos komanda úshin de mańyzdy oıyndy B.Zaınýtdınov qosalqy quramda bastady.
Birinshi taımda 10-mınýtta qonaqtardyń sapyndaǵy qorǵaýshylardyń qateligin paıdalanǵan Alekseı Ionov 30 metrdeı jerden qaqpashy ıAroslav Godzıýrdan aılasyn asyrdy - 1:0.
Alań ıeleriniń budan keıin de gol soǵatyn múmkindikteri boldy. Biraq ony paıdalana almady. Esesine 52-mınýtta «Ýraldan» jartylaı qorǵaýshy Otman El-Kabır jeke sheberligi arqasynda «Rostovtyń» qorǵaýshylary men qaqpashysy Sergeı Pesıakovty qapy qaldyrdy - 1:1.
Bul matchta qalaıda jeńýdi maqsat tutqan kezindegi tanymal oıynshy, «Rostovtyń» bas bapkeri Valerıı Karpın shabýyl shebin jandandyryp, 68-mınýtta Qazaqstan men Ózbekstan ulttyq quramalarynyń músheleri Baktıer Zaınýtdınov pen Eldor Shomýrodovty shyǵardy. Az ýaqyt berilse de, bul ekeýi ózara túsinisip oınaı alatynyn kórsetti. Baktıer birneshe shabýylǵa qatysty. Kóp uzamaı 84-mınýtta Bolgarııanyń tájirıbeli oıynshysy Ivelın Popov ta qosyldy.
Aqyry 93-mınýtta buryshtamadan berilgen doptan keıin «Rostovtan» slovenııalyq qorǵaýshy Mıha Mevlıa jeńis golyn soǵyp ketti - 2:1.
Bul matchtan keıin 32 upaı jınaǵan «Rostov» komandasy premer-lıgada altynshy orynda keledi. V.Karpınniń shákirtteri kelesi kezdesýin 7 sáýir kúni Ýfada bıylǵy maýsymda oıyny qojyrap, sońǵy oryndardyń birinde kele jatqan jergilikti komandamen ótkizedi. «Ýfanyń» quramynda budan buryn taǵy bir qazaqstandyq jas shabýylshy Erkebulan Seıdahmettiń bolǵany belgili. Alaıda ol jaraqatyna baılanysty kóp oıynnan tys qalyp, bıyl Bolgarııanyń ataqty «Levskı» klýbyna aýysty.
Aıta keteıik, B.Zaınýtdınov Reseı chempıonatynda ázirge gol soǵa qoıǵan joq. Degenmen kóbirek senim artylsa, Baktıerdiń óz múmkindikterin qur jibermesi anyq.
