Fýtbol: Zaınýtdınov TsSKA klýbynyń úzdik oıynshysy atandy
NUR-SULTAN. QazAqparat – Qazaqstandyq Baktıer Zaınýtdınov qyrkúıek aıynyń qorytyndysy boıynsha máskeýlik TsSKA klýbynyń úzdik oıynshysy atandy, dep habarlaıdy QazAqparat tilshisi.
TsSKA fýtbol klýby málim etkenindeı, ol ótken aıda komandanyń barlyq úsh oıynyna qatysqan.
Klýbtyń resmı saıtynda jankúıerler arasynda ótken daýys berý nátıjesinde Qazaqstan ulttyq quramasynyń oıynshysy B.Zaınýtdınov úzdik shyqty. Ol daýystyń 37 paıyzyn jınady. Horvatııalyq Nıkola Vlashıch ekinshi (23 paıyz), qaqpashy Igor Akınfeev úshinshi (18 paıyz) orynda.
Daýys berýge barlyǵy 12544 adam qatysty.
Reseı premer-lıgasynda 19 upaımen úshinshi orynda kele jatqan TsSKA kezekti oıynyn 18 qazan kúni «Dınamo» (Máskeý) komandasymen ótkizedi. Al 22 qazanda Eýropa lıgasynyń K tobynda Aýstrııada «Volfsberg» klýbymen alańǵa shyǵady.
Eske sala keteıik, budan buryn B.Zaınýtdınovtyń TsSKA sapyndaǵy alǵashqy golyn soqqanyn jazǵan bolatynbyz.
