Fýtbol: «Vostok» klýbyn birinshi lıgaǵa aýystyrý týraly sheshim qabyldandy
ASTANA. Qańtardyń 13-i. QazAqparat /Ernur Aqanbaı/ - Qazaqstan Fýtbol federatsııasynyń Baqylaý jáne tártip komıteti Óskemnniń «Vostok» fýtbol klýbyn Premer-lıgadan birinshi lıgaǵa aýystyrý týraly sheshim qabyldady,
dep habarlaıdy QazAqparat.
Qazaqstan Fýtbol federatsııasynyń málimetinshe, mundaı sheshim qabyldaýǵa «Vostok» klýbynyń fýtbolshylar aldyndaǵy bereshekti merziminde ótemegeni sebep bolǵan. Qaryzdy óteýge berilgen merzim qańtardyń 10-da aıaqtalǵan. «Baqylaý jáne tártip komıteti «Vostok» fýtbol klýbyn aqpannyń 15-ne deıin barlyq qaryzdardy jabýǵa mindettedi. «Vostok» 10 kúnniń ishinde Qazaqstan Fýtbol federatsııasynyń Appelıatsııalyq komıtetine atalmysh sheshimge baılanysty shaǵymdana alady. Eger bulaı istemese, nemese Appellıatsııalyq komıtet Baqylaý jáne tártip komıtetiniń sheshimin kúshinde qaldyrsa, onda 2010 jylǵy Premer-lıgaǵa qatysýshylardyń quramyn qaıta qaraý týraly sheshimdi Atqarýshy komıtet qabyldaıdy», delingen QFF-nyń taratqan habarlamasynda.
