Fýtbol: Vardan Mınasıan «Taraz» komandasyna bas bapker boldy
NUR-CULTAN. QazAqparat - Armenııalyq fýtbol mamany Vardan Mınasıan «Taraz» komandasyna bas bapker bolyp taǵaıyndaldy, dep habarlaıdy QazAqparat tilshisi klýbtyń baspasóz qyzmetine silteme jasap.
V.Mınasıan 1974 jyly dúnıege kelgen. Sporttyq jolyn Armenııanyń «Zangazýrynda» 1991 jyly bastasa, odan keıingi jyldarda sol eldiń «Pıýnık», «Erevan», Shveıtsarııanyń «Lozanna», Reseıdiń «Lokomotıv» (Sankt-Peterbýrg) komandalarynda oınady.
Bapkerlik qyzmetin 2001 jyly Armenııanyń 21 jasqa deıin quramasynda bastady. Odan keıingi jyldarda sol eldiń «Pıýnık» komandasynyń tizginin birneshe márte ustasa, Armenııa quramasyna bas bapker qyzmetin úsh márte atqardy. Búginge deıin «Ararat-Armenııa» komandasynda eńbek etti. 2014-2015 jyldarda Qostanaıdyń «Tobyl» komandasynda bas bapker boldy.
Armenııa quramasynyń bas bapkeri retinde ol Eýro-2012 chempıonatynyń irikteý kezeńinde Slovakııany 3:1, 4:0, Makedonııany 4:1 esebimen utyp, Reseımen teń túsip - 0:0, óz tobynda úshinshi orynǵa jaıǵasty. Sondaı-aq, 2014 jylǵy álem chempıonatyna irikteýde toptyq kezeńde Danııany 4:0, Chehııany 2:1, Bolgarııany 2:1 esebimen jeńip, syrt alańda Italııamen 2:2 teń oınady. Mınasıan qyzmet atqarǵan jyldarda Armenııa quramasy FIFA reıtınginde 103 orynnan 34-shi orynǵa kóterildi.
Al klýbtyq deńgeıde «Pıýnıkpen» 4, «Ararat-Armenııamen» 2 márte el chempıony boldy. Sonymen qatar, Armenııa kýbogyn 2, sýperkýbokty 3 ret aldy. Oǵan qosa 5 dúrkin Armenııanyń úzdik bapkeri atandy.
Aıta ketsek, budan buryn Andreı Karpovıchtiń «Qyzyljarǵa» bas bapker bolǵany habarlanǵan edi.
