Fýtbol: Ulttar Lıgasyn qazaqstandyq telearnalar kórsetedi
ASTANA. QazAqparat - 6 qyrkúıekte bastalatyn ÝEFA-nyń jańa týrnıri - «Ulttar Lıgasyn» qazaqstandyqtar Qazaqstan men Qazsport telearnalarynan tamashalaı alady. Bul týraly «Qazaqstan» teleradıokorporatsııasynyń Basqarma tóraǵasy Erlan Qarın Feısbýktegi paraqshasynda jazdy, dep habarlaıdy QazAqparat.
«Qazaqstan» korporatsııasy «Ulttar Lıgasy» matchtaryn translıatsııalaý quqyǵyna ıe boldy. 2018 jyldyń 6 qyrkúıeginen 20 qarashasyna deıin Qazaqstan men Qazsport telearnalary Ulttyq quramalarǵa arnalǵan ÝEFA-nyń jańa týrnıriniń qyzyqty kezdesýlerin kórsetedi. Eń aldymen, Korporatsııa D Lıgasynda óner kórsetetin Qazaqstan quramasynyń matchtaryn kórsetý quqyǵyna ıe boldy. Sonymen birge quramy boıynsha eń myqty A Lıgasyndaǵy oıyndaryn kórsetý quqyǵy alynyp otyr. Onda Eýropanyń eń myqty Ulttyq quramalary: Germanııa, Anglııa, Ispanııa, Italııa, Horvatııa, Frantsııa, Nıderlandy, Belgııa jáne ózge elderdiń fýtbolshylary óner kórsetedi», - deıdi ol.
Erlan Qarınniń jazýynsha, jańa týrnırdiń starty dál osy Astanada bastalady. Naqty aıtqanda, «Astana-Arenada» 6 qyrkúıek kúni Qazaqstan men Grýzııa komandalary kezdesedi.
«Atalmysh týrnır buryn Eýropa chempıonatyna túsip kórmegen komandalar úshin biregeı múmkindik bolyp otyr. Saıystardyń qorytyndysy boıynsha jeńimpazdar EÝRO-2020 irikteýine ótedi. Sonymen qatar, dál osy Astanada ÝEFA Kongresinde 2014 jyly «Ulttar Lıgasy» týrnırin qurý týraly sheshim qabyldanǵan bolatyn. 6 qyrkúıek kúni saǵat keshki 20:00 kezinde Qazaqstan men Grýzııa elderi quramalarynyń kezdesýin Qazsport arnasynan jiberip almańyzdar. Sondaı-aq, barlyq kezdesýlerdi Qazaqstan TV mobıldik qosymshasy arqyly da kórýge bolady», - deıdi Erlan Qarın.
