Fýtbol: Ulttar lıgasy fınaldyq kezeńiniń jerebesi tartyldy
ASTANA. QazAqparat - Búgin Irlandııa astanasy Dýblın qalasynda fýtboldan Ulttar lıgasy fınaldyq kezeńiniń jerebesi tartyldy, dep habarlaıdy QazAqparat.
Jarys erejesine sáıkes, A lıgasynda óz tobynda jeńimpaz atanǵan tórt qurama jartylaı fınal jáne fınaldyq oıyn ótkizedi. Búgingi jerebe barysynda 2019 jylǵy 5 maýsymda Portýgalııa men Shveıtsarııa, 6 maýsymda Gollandııa men Anglııa quramalary kezdesetin boldy.
Bul juptar boıynsha jeńimpazdary fınalda, jeńilgen quramalar 3-oryn úshin sheberlik baıqasady. Atalmysh kezdesýler 9 maýsymda ótkiziledi.
Esterińizge sala ketelik, fýtboldan Ulttar lıgasy oıyndary bıyl tuńǵysh ret ótkizildi. Ol 2018 jyldyń qyrkúıek jáne qarasha aılary aralyǵynda boldy. ÝEFA quramyndaǵy 55 qurama tórt lıgaǵa bólinip synǵa tústi. Qazaqstan D lıgasy birinshi tobynda Grýzııa, Latvııa jáne Andorra quramalarymen kezdesti. Nátıjesinde óz tobynda ekinshi oryn aldy. Bul toptan Grýzııa jeńimpaz atandy. Olar kelesi Ulttar lıgasynda S lıgasynda baq synaýǵa múmkindik aldy.
Sondaı-aq, keshe Eýropa birinshiligi irikteý kezeńiniń jerebesi tartylyp, Qazaqstan I tobynda synǵa túsetin boldy.
