Fýtbol: Ýkraınanyń ataqty fýtbolshysy «Tobylmen» qosh aıtysty
QOSTANAI, QazAqparat - Qostanaıdyń «Tobyly» ýkraınalyq legıoner Vasılıı Kobınmen aradaǵy eńbek qatynasyn úzdi, dep habarlaıdy QazAqparat tilshisi.
Aqparatty klýbtyń baspasóz qyzmeti rastady. Ýkraına quramasynyń burynǵy oıynshysy, 32 jastaǵy qorǵaýshy Vasılıı Kobın qostanaılyq klýbpen 1 jylǵa kelisim-shartqa otyrǵan-dy.
Aıta keteıik, Kobın Ýkraına Premer-lıgasynda 200-den astam matchqa qatysqan.
Ol 2001 jyly «Zakarpate» klýbymen kelisimshart jasasty. Keıin Ýkraınanyń «Karpaty» jáne ataqty «Shahter» komandalarynda oınaǵan. Munan soń Harkovtiń «Metallıst» klýbyna aýysty.
Kobın 2015 Chempıondar lıgasyna qatysyp, Madrıdtiń «Realyna» qarsy dop tepken. Onyń qanjyǵasynda Ýkraınanyń 6 dúrkin chempıony, 5 márte Kýbok ıegeri, Sýperkýbok oıyndarynyń jeńimpazy syndy ataqtary bar. Ol klýbtyq jetistikteri jóninen Ýkraınanyń ataqty fýtbolshylary qataryna enedi.
