Fýtbol týrnıriniń jeńimpazy - Parlament komandasy
ASTANA. 17 qazan. QazAqparat - «Alataý» sport kesheninde QR Parlamenti Májilisiniń birinshi shaqyrylymynyń tóraǵasy, memleket jáne qoǵam qaıratkeri,
ǵalym-ekonomıst Marat Turdybekuly Ospanovty eske alýǵa arnalǵan shaǵyn fýtboldan jarys bolyp ótti, dep habarlaıdy Májilistiń baspasóz qyzmeti.
Úshinshi ret ótkizilgen bul fýtbol týrnırine elordada ornalasqan birqatar elshilikterdiń komandalary da qatysty. QR Parlamenti Májilisi Tóraǵasynyń orynbasary Vladımır Bobrov bıylǵy jarystyń halyqaralyq mánge ıe bolyp otyrǵanyn aıta kelip, memleketimizde salaýatty ómir saltyn ustanýǵa basa mán berilip kele jatqanyn málim etti. Osy oraıda Parlament memleket jáne qoǵam qaıratkeri Marat Turdybekulynyń júldesi úshin úshinshi ret jarys uıymdastyryp otyrǵanyn jetkizdi.
Bıyl bul týrnırge 8 komanda qatysty. Jarys qorytyndysynda úsh oıynnan 9 upaıdan jınaǵan «Habar» agenttigi men Parlament komandasy fınalǵa shyqty. Tartysty ótken kezdesýde Parlament komandasy 5:1 esebimen jeńiske jetip, bas júldege ıe boldy.
Úshinshi oryn úshin bolǵan kezdesýdiń negizgi ýaqytynda Syrtqy ister mınıstrliginiń ókilderi men Ospanovtar otbasy komandasy 3:3 esebimen teń tústi. Penaltı boıynsha 2:3 esebimen basym túsken Ospanovtar otbasy alǵash ret qatysqan týrnırdiń júldegeri atandy.
Jeńimpaz komandaǵa parlamenttik kýbok tabys etildi. Jankúıerlerdiń yqylasyna bólengen oıynshylar da úzdik sportshylarǵa beretin marapattarǵa ıe boldy.
