Fýtbol: «Tobylǵa» jańadan eki oıynshy keldi

QOSTANAI.QazAqparat – Qostanaıdyń «Tobyly» eki fýtbolshymen kelisim-shart jasasty, dep habarlaıdy QazAqparat klýbtyń baspasóz qyzmetine silteme jasap.

Gvıneıa-Bısaý ulttyq quramasynyń jartylaı qorǵaýshysy Tonı Sılva jańa maýsymda «Tobyldyń» namysyn qorǵaıdy.

Aıta ketý kerek, Tonı Sılvanyń portýgaldyq pasporty da bar. Basqa elde tursa da, Portýgalııada jastyq shaǵyn ótkizdi. 2015-2016 jyldary ulttyq chempıonatta óner kórsetti. «Ýnıo Madeıro» komandasy úshin 14 match ótkizip, úsh gol soqty.

«Ol 2009 jyly Anglııaǵa qonys aýdardy, «Chelsı», «Lıverpýl» jastar komandalarynda, sondaı-aq «Barnslı» jáne «Dagenhem» quramynda oınady. 2020 jylǵa deıin Tonı Grekııa, Gvıneıa-Bısaý, Bolgarııa, Túrkııa, Saýd Arabııasy klýbtarynda óner kórsetti. Ótken jyly jartylaı qorǵaýshy «Tarazben» kelisimshartqa qol qoıdy. Debıýttik maýsymynda jambyldyqtar sapynda 17 matchta 4 gol soqty. Halyqaralyq deńgeıde Sılva Portýgalııanyń jasóspirimder quramasynda óner kórsetti, biraq keıin Gvıneıa-Bısaý quramasyn tańdady. Ulttyq quramadaǵy 11 oıynda ol eki gol soqty», delingen klýb aqparatynda.

«Tobyl» Grýzııa quramasynyń shabýylshysy Elgýdja Lobjanıdzemen tolyqty. Elgýdja – «VIT-Djordjııa» (Grýzııa) klýbynyń túlegi. Sonymen qatar, ol óz otanynda «Shýkýrý», «Dınamo», «Rýstavı» quramynda, 2017 jyly Reseıde «Orenbýrg» sapynda óner kórsetti.

2019 jyldyń aqpan aıynda oıynshy «Tarazǵa» aýysty. Ótken maýsymda 28 jastaǵy oıynshy «Qaısar» jeıdesinde 13 matchta 8 gol soqty. Ulttyq quramada 2017 jyly debıýt jasap, 11 match ótkizdi.