Fýtbol: «Tobyl» syrt alańda jeńiske jetti
QOSTANAI. QazAqparat - Qazaqstan chempıonatynyń 3-týrynda «Tobyl» syrt alańda Petropavldyń «Qyzyl-Jar SK» klýbyn utty, dep habarlaıdy QazAqparat.
Petropavldyń "Qarasaı" stadıonynda ótken oıynnyń 22-mınýtynda esep ashyldy. Aldymen Freddı Koronel buryshtama dobyn asyrdy. Qarbalas sátte «qyzyljarlyq» Tımýr Mýldınov dopty alys buryshqa tepti. 1:0. Birinshi taımda osy esep saqtaldy.
Oıynnyń ekinshi bóligi «Tobyl» fýtbolshylarynyń basymdyǵymen bastaldy. Alańǵa tyńnan qosylǵan Tańat Nóserbaev sheberlik kórsetip, tarazy basyn teńestirdi. Ol qaqpashymen betpe-bet shyǵyp, aılasyn asyryp ketti. Qonaqtar 79-mınýtta esepti eseledi. Sol qaptaldan alǵa umtylǵan Nóserbaev aıyp alańyna pas asyrdy. Bul joly dopqa Maksım Fedın úlgerip, baspen soqqy jasady. «Qyzyl-Jar» qaqpashysy torda týlaǵan dopty alyp shyǵýǵa májbúr boldy.
Osylaısha, «Tobyl» syrt alańda 3 upaıǵa ıe boldy. Kelesi match «Atyraýǵa» qarsy ótedi.
Foto: fctobol.kz
