Fýtbol: «Tobyl» óz alańynda «Shahterden» basym tústi
NUR-SULTAN. QazAqparat - Búgin fýtboldan Premer-lıga komandalary arasyndaǵy Qazaqstan birinshiligi birinshi týrynyń alǵashqy oıyn kúni «Tobyl» jáne «Shahter» kezdesýimen aıaqtaldy, dep habarlaıdy QazAqparat tilshisi.
Eki komanda da bıylǵy dop dodasyna tyńǵylyqty daıyndaldy. Ótken jyly «Tobyl» el birinshiliginde tórtinshi oryn alyp, eýrokýbok oıyndarynan tys qalyp qoıdy. Sol ketken eseni bıyl qaıtarýǵa tyrysady. Komanda quramyna kóptegen jańa oıynshylar shaqyrý aldy. Bas bapker qyzmetine qazaqstandyq maman Grıgorıı Babaıan keldi. Osyndaı ózgerister «Shahter» tarapynan da jasaldy. Komanda tizginin reseılik maman Vıacheslav Groznyı ustasa, kóptegen jańa fýtbolshylar kenshiler klýby qataryn tolyqtyrdy.
Búgingi kezdesý tartysty órbidi. Qos komanda da shabýyl shebinde jıi boı kórsetti. Oıynnyń 17-mınýtynda Roman Mýrtazaev «Tobyldy» alǵa shyǵarsa, «Shahter» sapynan Arsen Hýbýlov tarazy basyn teńestirdi. Oıynnyń 87-mınýtynda qostanaılyq oıynshy Azat Nurǵalıev óz komandasyn taǵy alǵa shyǵarsa, 88-mınýtta onyń komandalas áriptesi Lýka Zarandııa qorytyndy esepti belgiledi.
Sondaı-aq, búgin «Astana» «Qyzyljardy» 4:0, «Qaırat» «Tarazdy» 2:1, «Ordabasy» «Oqjetpesti» 1:0 esebimen tize búktirdi .
Alǵashqy týrdyń qalǵan eki oıyny 8 naýryzda ótedi. Qyzylordada «Qaısar» men Pavlodardyń «Ertisi», Aqtaýda «Kaspıı» men Taldyqorǵannyń «Jetisý» komandalary kezdesedi