Fýtbol: «Tobyl» oıynshysy Frantsııa chempıonatyna aýysty

NUR-SULTAN.QazAqparat – Qostanaıdyń «Tobyly» men Grýzııa ulttyq quramasynyń jartylaı qorǵaýshysy Djaba Kankava Frantsııa chempıonatyna aýysty, dep habarlaıdy QazAqparat tilshisi.

Aqparatty agenttik tilshisine oıynshynyń ózi rastady. Djaba Frantsııanyń ekinshi lıgasynda óner kórsetetin «Valansen» klýbyna aýysty. Qazirgi ýaqytta komanda birinshiliktiń onynshy orynynda.

Kankava qostanaılyq «Tobyl» sapyna 2017 jyldyń sońynda qosyldy. Ol «Tobyldan» bólek, Grýzııanyń «Dınamosynda», reseılik «Alanııa» jáne Ýkraınanyń «Arsenal», «Dnepr», «Krıvbass» komandalary sapynda oınaǵan. Keıin Frantsııanyń «Renn» klýbynda dop tepti.

Djaba Kankava fýtbolsúıer qaýymǵa óziniń erligimen de belgili. 2014 jyly Ýkraına birinshiliginde qatty soqqydan esinen aıyrylyp, tilin jutyp qoıǵan kıevtik «Dınamo» kapıtany Oleg Gýsevtiń janyn aman alyp qalǵan edi. Bul batyldyǵy úshin Djaba Ýkraınanyń Memlekettik Tótenshe jaǵdaılar qyzmetiniń qurmet gramotasyna ıe bolǵan.