Fýtbol: «Tobyl» men «Aqjaıyq» teń tarqasty
ORAL. QazAqparat - Fýtboldan el birinshiliginiń altynshy týrynda Qostanaıdyń «Tobyly» óz alańynda Oraldyń «Aqjaıyǵyn» qabyldady, dep habarlaıdy QazAqparat tilshisi.
Qostanaılyqtar kósh bastaýshy komandalardyń biri bolsa, «Aqjaıyq» týrnır kestesinde bel ortada keledi. Soǵan qaramastan, qarymta shabýyl kezinde oraldyqtar esep ashty. Ýkraınalyq legıoner Andreı Tkachýk alystan Azat Ersálimovke dál pas berdi. Oń qaptaldan sýyrylyp shyqqan Azat taǵy bir ýkraınalyq oıynshy Aderınsola Habıb Eseolany tapty. Eseola múlt ketken joq. Sóıtip ol bıylǵy chempıonattaǵy úshinshi golyn soqty.
Alań ıeleri alǵa umtylyp baqqanymen, kópke deıin eshteńe shyǵara almady. 33-mınýtta astanalyq tóreshi Tımýr Qumashev oraldyq Erkebulan Nurǵalıevti sımýlıatsııa jasady dep, ekinshi eskertý berip, alańnan qýdy. On oıynshymen «Aqjaıyq» qıyn jaǵdaıda qaldy. Endi olarǵa tek qorǵanýǵa týra keldi.
Ekinshi taımda «Tobyldyń» bas bapkeri Vladımır Nıkıtenko basqa amaly taýsylǵan soń, 58-mınýtta Tańat Nóserbaevty shyǵardy. Kóp uzamaı bul taktıka óz jemisin berdi. Komanda kapıtany Azat Nurǵalıevtiń pasynan keıin T.Nóserbaev 70-mınýtta tarazy basyn teńestirdi.
Budan keıin qostanaılyqtardyń jeńisti julyp alatyndaı múmkindikteri boldy. Degenmen keıde olarǵa dáldik jetispedi. Oǵan qosa «Aqjaıyqtyń» qaqpashysy, ýkraınalyq Evgenıı Borovık sátti oınap, eki márte óz qaqpasyn aman saqtap qaldy.
Osylaısha qos komanda 1:1 esebimen teń tarqasty.
Sol sııaqty búgin Petropavlda jergilikti «Qyzyljar» «Atyraýdy» qabyldap, bul oıyn da dál sondaı eseppen aıaqtaldy. 24-mınýtta qyzyljarlyq Shota Grıgalashvılı 11 metrlik aıyp dobyn dál oryndasa, 76-mınýtta «Atyraý» sapyndaǵy Oral fýtbolynyń túlegi Eldar Ábdirahmanov esepti teńestirdi.
