Fýtbol: «Tobyl» komandasy «Astana» men «Qaırattyń» aldyna shyqty
NUR-SULTAN. QazAqparat - Fýtboldan Premer-lıga komandalary arasyndaǵy Qazaqstan chempıonatynyń úshinshi týry máresine jetti, dep habarlaıdy QazAqparat tilshisi.
Aıta keterligi, búgingi úsh kezdesýde de alań ıeleri sanalǵan komandalar oıyndaryn ózge qalada ótkizýge májbúr boldy. Sebebi, Aqtóbe, Qaraǵandy, Kókshetaý qalalarynda stadıondar ázirge mundaı deńgeıdegi kezdesýlerdi ótkizýge daıyn emes. Sondyqtan bul kezdesýler Qostanaı jáne Nur-Sultan qalalarynda oınady.
Qostanaıda «Aqtóbe» Almatynyń «Qaıratyn» qabyldady. Bul kezdesýde aqtóbelik klýb taǵy da jeńilistiń aşy dámin tatty. Oıynnyń alǵashqy kezeńinde «Qaırat» sapynan Konrad Vjesınskı 12, Dıno Mıkanovıch 35, Aderınsola Eseola 45-mınýtta úsh gol soǵyp úlgerdi. Oǵan 72-mınýtta aqtóbelik Anton Shýrygın jalǵyz golmen jaýap qaıyrdy. Oıynda «Qaırat» 3:1 esebimen jeńiske jetti.
Odan keıingi kezdesýde Nur-Sultan qalasyndaǵy «Astana-arena» stadıonynda ótkizildi. Onda Qaraǵandynyń «Shahteri» Qostanaıdyń «Tobyl» komandasymen sheberlik baıqasty. Oıyn taǵdyry sheshken jalǵyz goldy 88-mınýtta qostanaılyq shabýylshy Senan Sebaı óz enshisine jazdy. Osylaısha «Tobyl» 1:0 esebimen jeńiske jetti. «Tobyl» «Astana» men «Qaıratty» artqa salyp, týrnır kestesinde kósh tizginin qolǵa aldy.
Al eloradamyzda ótken «Oqjetpes» pen «Ordabasy» komandalary arasyndaǵy kezdesýde esep ashylǵan joq. «Oqjetpes» bıylǵy dop dojasyndaǵy alǵashqy upaıyna qol jetkizdi. «Ordabasy» jeti upaımen tórtinshi orynǵa kóterildi.
Keshe, 30 naýryzda 3-týrdyń alǵashqy úsh oıyny bolyp ótti. Bul joly Pavlodarda «Ertis» Qyzylordanyń «Qaısarynan» 0:1, Taldyqorǵanda «Jetisý» elordalyq «Astanadan» 0:2 esebimen jeńilse, «Taraz» óz alańynda «Atyraýdy» 2:0 esebimen jeńdi.
Endi tórtinshi týr oıyndary 6 jáne 7 sáýir kúnderi bolady. 6 sáýirde «Tobyl» men «Aqtóbe», «Ordabasy» men «Jetisý», «Qaısar» men «Astana», «Qaırat» pen «Oqjetpes», «Ertis» pen «Taraz» komandalary kezdesse, 7 sáýirde «Atyraý» men «Shahter» klýbtary sheberlik baıqasady.
