Fýtbol: «Tobyl» kapıtany klýbtan ketti
QOSTANAI. QazAqparat - Qostanaılyq «Tobyl» fýtbol klýbynyń kapıtany Almır Mýhýtdınov komandadan ketti, dep habarlaıdy «QazAqparat» HAA tilshisi.
Qostanaılyq fýtbol klýbynyń dırektory Nıkolaı Panın 32 jastaǵy Mýhýtdınovpen kelisimsharttyń toqtatylǵanyn aıtty.
«Biz qysqy aýys-túıis kezinde Djaba Kankava, Maksım Fedın, Aslan Darabaev, Jalǵas Ábilǵazy esimdi fýtbolshylarmen kelisimshartqa otyrdyq. Maýsym aıaqtalysymen Mark Gýrman, Raýl Djalılov, Evgenıı Levın, Amır Bekıch «Tobyldan» ketti. Buǵan qosa komanda kapıtany Almır Mýhýtdınovtyń basqa klýbta óner kórsetetini belgili boldy. Sondaı-aq, «Astanadan» jalǵa alynǵan Jalmukan men Lýllaký komandalaryna qaıta oraldy», - dedi Panın «Tobyldyń» baspasóz qyzmetine jarııalaǵan habarlamasynda.
Aıta keteıik, jartylaı qorǵaýshy A.Mýhýtdınov «Tobylmen» 2018 jyldyń sońyna deıin kelisim-shartqa otyrǵan. Fýtbolshy «QazAqparat» tilshisine bergen jaýabynda eńbek qatynasy eki taraptyń kelisimimen buzylǵanyn aıtty.
«Negizi men áli bir jyldan astam ýaqyt Qostanaıda qalýym kerek edi. Biraq, osy aptada áriptesterimmen qoshtastym. Eki taraptyń sheshimi arqyly men basqa klýbqa ketetin boldym», - dedi ol.
32 jastaǵy Mýhýtdınov - máskeýlik TsSKA fýtbol mektebiniń túlegi. 2013 jyly «Ertiske», eki jyldan soń «Tarazǵa» aýysty. Qazaqstan chempıonatynda barlyǵy 129 match ótkizip, 4 gol soqqan. «Tobyl» sapynda 27 oıynǵa qatysqan. Buǵan qosa QR Ulttyq quramasynyń 3 kezdesýine shyqqan.
